कार्यकर्तालार्इ देउवाकाे अादेश : माधव नेपाल जति हिम्मत छैन ! अाेली विरूद्द बाेल्न के डर ?

भैरहवा : नेपाली कांग्रेसका सभापति शेरबहादुर देउवाले आफ्नै पार्टीका नेता र कार्यकर्ताहरु आफू विरुद्ध उत्रिए पनि अधिनायकवादतिर लम्किरहेको केपी ओली नेतृत्वको सरकार विरुद्ध उनीहरु चुइक्क समेत नगरेको भन्दै रुष्ट भएका छन् ।

बिहीबार भैरहवामा आयोजित नेपाली कांग्रेस महासमिति बैठकका सन्दर्भमा राजनीतिक एवं मस्यौदा सुझाव संकलनका लागि ५ नम्बर प्रदेश स्तरीय कार्यशालाको उद्घाटन गर्दै उनले पार्टीका केही नेताहरु सरकारको गलत कदम विरुद्ध चुइक्क नबोल्दा सरकार थप अधिनायकवाद तर्फ लम्किएको बताए ।

'मुलुकमा हत्या बलात्कार जस्ता घटना दिन प्रतिदिन बढ्दै छ । निर्मला हत्याकाण्डको दोषीलाई सरकारले बचाउन खोजिरहेको छ, तर पनि हाम्रा नेताहरु सरकार गलत कदम प्रति बोल्न सकेका छैनन् । अहिले मेरो विरुद्ध बोल्न सजिलो छ तर ओली विरुद्ध हाम्रो पार्टीको नेता किन बोल्दैनन् ?' उनले भने, 'नेकपाका नेता माधव कुमार नेपाल केपी ओली विरुद्ध बोलिसके, के माधव नेपालले बोले जति हिम्मत हाम्रो नेताहरुमा छैन । नेकपा खिलाफ बोल्नुस, किन डराउनुहुन्छ ?'

सरकारले मुलुकमा महंगी, कर वृद्धि गरेर जनताको ढाड सेक्ने काम गरिरहेको बताउँदै सभापति देउवाले केपी ओलीको नाम 'करप्रसाद ओली' राख्नुपर्ने ब्यंग्य गरेका थिए । सरकार अधिनायकवाद तिर लम्किरहेकोले आफुहरु एक भएर अघि नबढे मुलुक संकटमा पर्ने उनले बताएका थिए । साथै कम्युनिष्ट सरकार विरुद्ध अन्तिम लडाईँ लड्नुपर्ने अवस्था आएको पनि उनकाे भनाइ थियाे ।