काठमाडौँ : कर्णाली प्रदेशका मुख्यमन्त्री महेन्द्रबहादुर शाहीले केही शक्तिहरु नेपालमा संघीयता फेल गर्ने षड्यन्त्रमा लागेको आरोप लगाएका छन ।
संवाद चौतारीले बिहीबार गरेको अन्तरसंवाद कार्यक्रममा बोल्दै मुख्यमन्त्री शाहीले संघीयता नरुचाउने केही शक्तिहरु केन्द्र, प्रदेश र स्थानीय सरकारबीच अधिकारको विवाद सल्काएर संघीयतालाई बदनाम बनाउने काम भएको दाबी गरे । उनले केही शक्तिहरु संघीयता नै असफल बनाउने दाउमा लागेको बताए ।
कम्यूनिस्ट पार्टीलाई दुईतिहाइ बहुमत दिएर जनताले अग्निपरिक्षा लिएको भन्दै उनले कसैलाई दोष दिएर अहिलेको सरकार उम्कन नपाउने बताए । संघीयता कागजमा व्यवस्था गरे पनि सोचमा स्थापित हुन नसकेको भन्दै उनले नयाँ व्यवस्थामा अभ्यस्त हुनका लागि ‘ब्रेन वार’ चलाउनुपर्ने बताए ।
केन्द्र सरकारले प्रशासनिक र वित्तीय अधिकारबारे अहिलेसम्म पनि प्रदेश सरकारलाई स्पष्ट अधिकार नदिएर काम गर्न कठिनाईमा पारेको भन्दै शाहीले केही दिनमै प्रधानमन्त्री र मुख्यमन्त्रीहरुबीच हुनलागेको समन्वय परिषद बैठकमा यसबारे विशेषरुपमा कुरा उठाउने जानकारी दिए ।
फरक प्रसंगमा मुख्यमन्त्री शाहीले सरकारले खटाएको ठाउँमा नजाने कर्मचारीलाई जागिरबाटै विदा गरेर नयाँ कर्मचारी भर्ना गर्ने आँट केन्द्र सरकारले गर्नुपर्ने समेत बताए ।
भिडियो
प्रतिक्रिया दिनुहोस !
