युवा स्वप्न सुमन (२२)का संसारभर करोडौं प्रशंसक छन् । प्रायः चुपचाप बसिरहने र आफ्नै दुनियाँमा मस्त रहने स्वप्नको कलिलो मुहार तर खारिएको आवाजले धेरैको मन जितेको छ ।स्वप्न सुमनको वास्तविक नाम सुमन थापा हो । कर्मा रेकर्डसँग अफिसियल्ली रूपमा सन् २०१४ बाट उनले आफ्नो गायन यात्रा सुरु गरेका थिए । त्यसपछि उनले जीवनमा कहिल्यै पछाडि फर्केर हेर्नु परेन ।
हिले स्वप्न कति व्यस्त छन् भने यो वर्षभर उनीसँग समय छैन । अबको एक वर्ष केही म्युजिकल कन्सर्ट छ । उनले भने, ‘र नयाँ एल्बमको पनि तयारी गर्दैछु ।’ प्रायः म्युजिक सिक्ने र बनाउने काममा नै व्यस्त रहन मन पराउने स्वप्नले गाएका एकपछि अर्को गीतले युट्युबमा सनसनी मच्चाएको छ । एक वर्षअगाडि उनको ‘कसरी भनूँ’ बोलको गीतमा दुई करोड चालीस लाखको भ्यु छ ।
‘म तिम्रो’, ‘दी कफी सङ’, ‘के सारो राम्री भाको’, ‘ए हेलो’, ‘थाहै भएन’, ‘जाने कुरा नगर’जस्ता उनका थुप्रै गीत चर्चित छन् ।
हाल स्वप्नको लेटेस्ट सङ ‘साथी’ (फ्रेन्ड्स फरेवर)को म्युजिक भिडियो टिनेजरमाझ लोकप्रिय बन्दैछ । तर, स्वप्नलाई आफू लोकप्रिय छु जस्तो विल्कुल लाग्दो रहेनछ । धेरै मानिसको भावना र निजी जीवनसँग गीत जोडिँदा त्यो आफैं लोकप्रिय बनेको हुनुपर्ने उनको ठम्याइ छ । भन्छन्, ‘मेरा गीत हृदयबाट निस्केका हुन्छन् । त्यहाँ इमानदारिता हुन्छ । सायद त्यसैले मानिसहरू मेरो म्युजिकसँग आफूलाई जोड्न सक्छन् ।’
जब स्वप्न हातमा गिटार बोकेर गाउन बस्छन् । उनको आवाज श्रीकृष्णले बजाउने बाँसुरीको धुनजस्तै गुञ्जन थाल्छ । र, सुन्नेहरू त्यसै मन्त्रमुग्ध हुन पुग्छन् । उनको गीतको लिरिक्स पनि निकै सरल हुन्छ, सजिलै बुझ्न र सम्झन सकिने ।
स्वप्नका फ्यानहरू यति धेरै छन् कि प्रत्येक दिन टेक्स्ट म्यासेजले उनको मोबाइल भरिन्छ । मेरा फ्यानहरू मेरा हरेक सोमा आउँछन् । उनी भन्छन्, ‘यसले मलाई साँच्चिकै राम्रो अनुभूति दिलाउँछ ।’
सानैदेखि गायक बन्ने इच्छाले नै उनलाई आज यो ठाउँमा पुर्यायो । कक्षा ४ मा हुँदा पहिलो पल्ट गीत गाएको उनी बताउँछन् । स्वप्न अहिले जति सफल छन् उनको सांगीतिक यात्रा त्यति नै अप्ठेरो थियो रे । कुनै समय उनले रेस्टुरेन्टमा वेटरको समेत काम गरे ।
स्वप्नका लाखौं डाइहर्ट फ्यान छन् । धेरैजसो केटी फ्यान स्वप्नको एक झलकका लागि मरिहत्ते गर्छन् । उनको कन्सर्ट सकेसम्म छुटाउँदैनन् । तर, स्वप्न कसका फ्यान हुन् त ? स्वप्न भन्छन्, ‘अहिले म पूर्ण रूपमा म्युजिकमा मात्र केन्द्रित छु । लभ गर्न त पूरै जिन्दगी बाँकी छ ।’ स्वप्नको म्युजिक मात्र होइन, लामो कालो कपालको पनि त्यति नै चर्चा हुने गर्छ । भन्छन्, ‘कपालको स्याहार गर्न दही प्रयोग गर्छु ।’ स्वप्नको जीवनशैली कस्तो होला भन्ने जिज्ञासा पनि धेरैलाई हुन्छ । उनी भन्छन्, ‘मेरो जीवन जिउने तरिका एकदम सिम्पल छ । एक त म आशावादी छु र अर्को निकै संवेदनशील ।’
स्वप्नको यही स्वभावले नै होला, उनी नेपाली म्युजिक इन्डस्ट्रीमा जमेका छन् । उनका प्रायः सबै गीत व्यक्तिका वास्तविक घटनाबाट प्रभावित छन् । भन्छन्, ‘जबसम्म म कुनै घटना र व्यक्तिबाट प्रभावित हुन्न, तबसम्म गीत बनाउँदिनँ । तर कुनै कुराले मन छोएपछि अटोमेटिक गीत फुर्छ ।’ भविष्यमा म्युजिक डिरेक्टर बन्ने सपना बोकेका स्वप्न रियल कुरा खोल्छन्, ‘प्रत्येक स्टेज प्रर्फमेन्सअगाडि मेरो मुटु जोडले धड्किन्छ । म नर्भस हुन्छु । सबै कुरा नौलो लाग्छ । निकै अनौठो अनुभव हुन्छ ।’ सिंगर, लिरिसिस्ट र कम्पोजरसमेत रहेका स्वप्न अहिले आर्बिटरी ग्रुपमा आबद्ध छन् ।
स्वप्नलाई गायक रोहित जोन क्षेत्रीको स्वर निकै मन पर्छ । म्युजिक फिल्डमा आउन पे्ररित गर्नेमा एड सेरेनाको नाम लिन रुचाउँछन् । स्वप्नसँग थुप्रै राम्रा गीतको कलेक्सन छ ।
काठमाडौंका रैथाने स्वप्न गायनबाहेक ट्राभलिङ र कुकिङमा पनि उत्तिकै रुचि राख्छन् । उनले आफ्नो म्युजिक करिअर स्टेजमा भजन गाएर सुरु गरेका थिए । यसका लागि इन्डिया गएको बताउँछन् उनी ।
प्रतिक्रिया दिनुहोस !
