बलिउड अभिनेत्री आलिया भट्ट कुनै कुरालाई पनि गम्भीरतापूर्वक लिन्नन्। आफ्नो कामप्रति शतप्रतिशत मेहनत गर्ने गरेको बताउने आलिया सबैलाई जित्छु भन्ने सोचका साथ कहिल्यै काम नगरेको बताउँछिन्। ‘म कुनै पनि कामलाई एकदमै गम्भीर रूपमा सोच्दिनँ’, आलिया भन्छिन्, ‘म फिल्म उद्योगमा दर्शकलाई मनोरञ्जन दिन आएकी हुँ। यो काम रमाईरमाई गर्न चाहन्छु, स्ट्रेस लिएर होइन।’
आफूले गरिरहेको कामबाट दर्शकको अपार माया पाएकोमा उनी आफैंलाई भाग्यमानी सम्झन्छिन्। ‘निर्देशक र काम गर्ने टिमबाट पनि सपोर्ट हुँदा अझै सजिलो भएको छ’, आलिया भन्छिन्, ‘यस दौरानमा मैले थुप्रै राम्रा साथी बनाउने मौका पाएँ।’
राम्रा फिल्ममा हाँस्दैखेल्दै काम सम्पन्न गर्न सकेकोमा आलिया खुसी छिन्। भन्छिन्, ‘मेरो एकमात्र उद्देश्य भनेको काम गर्दै जानु र अझै राम्रो कसरी गर्ने भन्नेमा केन्द्रित हुनु हो।’ आलियाको नयाँ फिल्म जोया अख्तरको ‘गुल्ली ब्वाइ’ रणवीर सिंहसँग आउँदै छ।
प्रतिक्रिया दिनुहोस !
