दोलखा : स्वर्गीय प्रकाश दाहालको स्मृतिमा दोलखामा सञ्चालन भएको प्रथम प्रकाश स्मृति कप– २०७५ को उपाधि प्लानिङ ब्वाइजले जितेको छ । शुक्रबार भएको फाइनल खेलमा आयोजक दोलखालाई २–१ ले पराजित गर्दै काठमाडौंको प्लानिङ ब्वाइजले उपाधि हात पारेको हो ।
निकै रोमाञ्चक खेलमा प्लानिङ ब्वाइजका लागि खेलको चौथो ४ मिनेटमै विदेशी खेलाडी काशीले गोली टोलीलाई अग्रता दिलाएका थिए । १७ औं मिनेटमा पिटर सेगुनले अर्को गोल गरी प्लानिङ ब्वाइजको अग्रता दोब्बर बनाए ।
दोलखाका लागि हिमाल श्रेष्ठले ३६ औं गोल गरी टोलीलार्इ खेलमा फर्काउने प्रयास गरे । त्यसपछि पूरा समयसम्म दुवै टोलीका गोल गर्ने प्रयास सफल हुन सकेनन्। २–१ को जित हात पार्दै प्लानिङ ब्वाइज उपाधि जित्न सफल भयो । मैदानमा हजारौं घरेलु दर्शकको साथ पाएको आयोजक दोलखाले उपविजेतामै चित्त बुझायो ।
विजेता प्लानिङ ब्वाइजले २ लाख ५० हजार नगदसहित शिल्ड, मेडल र प्रमाण पत्र हात पा¥यो । उप विजेता दोलखाले नगद १ लाख २५ सहितको पुरस्कार पाए ।सेमिफाइनसम्म पुगेका दिपशिखा क्लब नैकाप र एपीएफले ३०/३० हजार नगदसहित प्रमाणपत्र र मेडल प्राप्त गरे ।
प्रतियोगिताका विजेताहरुलाई खानेपानी तथा सरसफाई मन्त्री बिना मगरले पुरस्कार र प्रमाण पत्र वितरण गरेकी थिइन् । स्वर्गीय प्रकाश दाहालकी पत्नीसमेत रहेकी मन्त्री मगर प्रतियोगिता समापनकी प्रमुख अतिथीका रुपमा उपस्थित थिइन् ।
विजेता प्लानिङ ब्वाइजका खेलाडीहरु ट्रफी र पुरस्कारका साथमा । तस्बिर सौजन्य : सुरेन्द्र पौडेल
प्रतियोगिताको उत्कृष्ट किपरमा प्लानिङ ब्वाइजका विष्णु केसी, बेस्ट डिफेन्डर दोलखाका विवेक बुढाथोकी, उत्कृष्ट स्ट्राइकरमा दोलखाकै हिमाल श्रेष्ठ र दोलखाकै सुजन श्रेष्ठ म्यान अफ दी टुर्नामेन्ट बन्न सफल भए दिपशिखा युवा क्लव नैकापका दावा शेर्पाले हाई स्कोररको पुरस्कार पाए ।
व्यक्तिगत विधामा उत्कृष्ट सबैले जनही नगद १० हजारसहित शिल्ड, मेडल र प्रमाण पत्र प्राप्त गरे। पूर्ण संगठित सामाजिक शैक्षिक अभियान (रिनेजम) नेपालको आयोजना र दोलखा जिल्ला फुटल संघको व्यवस्थापनमा मंसिर १ देखि प्रतियोगिता सञ्चालन भएको थियो । प्रतियोगितामा राष्ट्रिय स्तरका क्लब एपीएफ र कुमारीसहित १२ टिम सहभागि थिए।
प्रथम प्रकाश स्मृति कप फुटबल प्रतियोगिताका संयोजक मिन कु. शिवाकोटीले प्रत्येक वर्ष फुटबल प्रतियोगिता आयोजना गर्ने बताए । हरेक वर्ष मंसिर १ गते देखि ७ गतेसम्म दोलखाको चरिकोटमा प्रकाश दाहाल स्मृतिकप फुटबल प्रतियोगिता आयोजना गरिने उनले जानकारी दिए । यस मात्रै नभएर चरिकोटलाई खेल नगरीको रुपमा विकास गर्नसमेत आफूहरु लागेको शिवाकोटीले दाबी गरे ।
प्रतिक्रिया दिनुहोस !
