राजविराज : सप्तरीको हनुमाननगर कंकालिनी नगरपालिका-१० इनरुवामा शुक्रबार राति बस दुर्घटनामा हुँदा मृत्यु हुनेको संख्या पाँच पुगेको छ। दुर्घटनामा एउटै गाउँका पाँच जनाको मृत्यु भएपछि डाकनेश्वरीको भुतही र पातो गाउँमा सन्नाटा छाएको छ।
सुनसरीको बराह क्षेत्र चतराधाममा नुहाएर ६० तीर्थयात्रु बोकेर सप्तरीको हनुमाननगर-राजविराज हुँदै फर्कदै गरेको को १ ख २७९९ नम्बरको बस दुर्घटना भएको हो।
घटनास्थलमै तीन र दुई जनाको उपचारका लागि अस्प्ताल लाने क्रममा बाटोमै मृत्यु भएको हो। मृतक पाँचै जनाको सनाखत भइसकेको छ।
दुर्घटनामा डाकनेश्वरी नगरपालिका ४ भुतहीका ५५ वर्षीय दिनेश रजक र उनकी श्रीमती ५० वर्षीया बौकी भनिने सुनिलादेवी रजक, वडा नम्बर ५ पातोकी ७० वर्षीया बेचनीदेवी यादव, ६० वर्षीया सिकिलदेवी साह र ६० वर्षीया भुखनीदेवी यादवको मृत्यु भएको हो।
सबैको सनाखतपछि अहिले पोस्टमार्टमको तयारी भइरहेको छ। घटना सुनेलगत्तै रातिदेखि नै सहयोग गर्ने घटनास्थल र अस्पताल पुगेका छन्। मृतकको पहिचान गर्न बिहान अस्पताल आएका मृतकका परिवारका सदस्य र आफन्तमा रुवाबासी चलेको छ।
घटनाले भुतही र पातो क्षेत्र नै शोकमा डुबेको छ। पाँच जनाको मृत्यु र ४९ जना घाइते हुने गरी भएको घटनाले सप्तरी जिल्लामा नै सन्नाटा छाएको राजविराज ७ का सुखराम यादवको भनाइ छ।
सोही दुर्घटनामा परी घाइते भएका १२ जनाको धरानस्थित बिपी कोइराला स्वास्थ्य विज्ञान प्रतिष्ठान र दुई जनाको विराटनगरस्थित नोबेल अस्पतालमा आइसियुमा राखेर उपचार भइरहेको जिल्ला प्रहरी कार्यालय सप्तरीले जनाएको छ। बस चालक फरार रहेको र घटनाबारे अनुसन्धान भइरहेको एसपी राजेन्द्र विष्टले बताए।
प्रतिक्रिया दिनुहोस !
