मलंगवा : सर्लाही क्रिकेट संघद्वारा मलंगवामा आयोजित दोस्रो मेयर कप क्रिकेटको उपाधि मलंगवा रेडले हात पारेको छ। मलंगवा ब्लूलाई ४ विकेटले पराजित गर्दै रेडले दोस्रो पटक उपाधि चुमेको हो।
जिल्ला खेलकुद समितिको खेल मैदानमा आयोजित प्रतियोगिताको फाइनल खेलमा पहिले ब्याटिङ्ग गरेको मलंगवा ब्लूले २० ओभरमा ७ विकेट गुमाउँदै १ सय ३९ रन बनाएका थिए। ब्लूका लागि संदिप ढुंगानाले सर्वाधिक ५७ रन बनाए।
जवाफमा ब्याटिङ्ग गर्न आएका रेडले हसिम अन्सारीको ४७ र मेहबुब आलमको ३४ रनको मद्दतले १९ दशमलव १ ओभरमा खेल जितेका थिए। ब्लूका लागि अमित श्रेष्ठ र योगेन्द्र कार्कीले समान २/२ विकेट लिएका थिए।
प्रतियोगिताको विजेता टिम कपसंगै नगद ५० हजार हात पारेको छ। त्यसैगरी उपविजेता टिमलाई कप सहित नगद २५ हजार प्रदान गरिएको संघका अध्यक्ष माधव कर्मचार्यले जानकारी दिए । प्रतियोगिताको म्यान अफ द सिरिज ब्लूका अमित श्रेष्ठलाई प्रदान गरिएको छ। मंसिर ३ गतेदेखि सुरु भएको प्रतियोगितामा जिल्लाका १२ ओटा टिमको सहभागिता रहेको थियो।
प्रतिक्रिया दिनुहोस !
