आन्तरिक राजश्व भद्रपुरले उठायो लक्ष्यभन्दा १ सय ४ प्रतिशत बढी राजश्व
मंसिर १३, २०७५ बिहीबार १०:२९:०
भद्रपुर : आन्तरिक राजश्व कार्यालय भद्रपुर, झापाले आर्थिक वर्ष २०७५/७६ को पहिलो चौमासिकमा लक्ष्यभन्दा बढी राजश्व संकलन गरेको छ। २०७५ श्रावणदेखि कार्तिक मसान्तसम्मको लक्ष्य ६८ करोड ९८ लाख ३९ हजार रहेकोमा ७१ करोड ९० लाख १६ हजार संकलन गरी लक्ष्यको तुलनामा १ सय ४ प्रतिशत बढी राजश्व संकलन गरेको हो।
अघिल्लो आ.व. २०७४/७५ सोही अवधिमा ५५ करोड ३३ लाख असुली भएकोमा सोको तुलनामा १ सय ३० प्रतिशत प्रगति भएको आन्तरिक राजश्व कार्यालय भद्रपुरका प्रमुख कर अधिकृत बोलराज आचार्यले बताए।
आर्थिक वर्ष २०७१/७२ को राजश्व असुलिको तुलनामा आ.व. २०७४/७५ मा शत प्रतिशत वृद्धि गरी सो बर्षको तुलनामा दोब्बर राजश्व संकलन गरेको छ । मेची अञ्चलका ताप्लेजुङ्ग, पाँचथर, इलाम र झापाको माईखोला पूर्वका १० वटा स्थानीय तहको क्षेत्राधिकार रहेको कर कार्यालयबाट संकलित उक्त राजश्वमा पछिल्लो समय करदाताको दायरा विस्तार र करदाता शिक्षाको सकारात्मक प्रभाव रहेको कार्यालय प्रमुख आचार्यले जानकारी दिए।
२०७५ कार्तिक महिनासम्ममा ५०/४० मुल्य अभिवृद्धि कर दर्तावालासहित कुल ५१ हजार १ सय ९८ करदाता पुगेको र पछिल्लो समयमा मुल्य अभिवृद्धि करतर्फ विवरण नबुझाउने करदाताको संख्या घट्दै गएको कार्यालयको तथ्याङ्कबाट देखिन्छ।
वार्षिक विधेयक २०७५ बाट हालै प्रदान गरिएको छुट सुविधाबाट दर्ता हुन छुट भएका करदाता दायरामा आउने र दर्ता भई कर कानुनको पालना नगरेका करदाताबाट सुविधा प्रयोग गरी परिपालन स्तर बढाउने अपेक्षा लिएको आचार्यले बताए।
यस छुट सुविधाको उपयोग गर्ने अवधि २०७५ पौष मसान्तसम्म रहेको र उक्त अवधिमा जिल्लास्तरीय उद्योगा वाणिज्यसंघ, उद्योगसंघ, नगरस्तरीय उद्योग बाणिज्य संघलगायतका पेशागत संघ संस्था र संवद्ध पक्षसँग सहकार्य भइरहेको समेत आचार्यले जानकारी दिए।
प्रतिक्रिया दिनुहोस !
