विराटनगर : आठौं राष्ट्रिय खेलकुद प्रतियोगिताका लागि मोरङमा अनौठो तरिकाले खेलाडी छनोट गर्ने काम भइरहेको छ । प्रशिक्षकको अनुपस्थितिमै आठौं राष्ट्रिय खेलकुदका लागि खेलाडी छनोट भइरहेको हो । प्रशिक्षक नभएपछि खेलकुदका विभिन्न संघमा आबद्ध पदाधिकारीहरू नै अहिले खेलाडी छनोटमा व्यस्त छन् । जिल्लामा २२ वटा खेलका खेलाडी छनोट गर्ने प्रक्रिया चलिरहेको छ ।
यसअघि १६ वटा खेलका खेलाडी छनोट गर्ने भनिए पनि शनिबार थप ६ खेलका खेलाडी छनोट गर्न राष्ट्रिय खेलकुद परिषद् (राखेप) ले निर्देशन दिएको जिल्ला खेलकुद विकास समिति मोरङका अध्यक्ष किशोरलाल अमात्यले जानकारी दिए । अमात्यका अनुसार यसअघि राखेपले १६ खेलका मात्रै खेलाडी छनोट गर्न भनेर पत्र पठाएको थियो । ‘धेरैजसो खेलका खेलाडी प्रशिक्षक बिना नै छनोट गर्ने काम भइरहेको छ,’ समितिका एक सदस्यले अन्नपूर्णसँग भने, ‘यसपटक राष्ट्रिय प्रतियोगितामा पठाउने खेलाडी छनोट गरिएको देखेर आश्चर्यमा परिएको छ ।’
प्रशिक्षकको अनुपस्थितिमा छनोट गरेर पठाइएका खेलाडीबाट राम्रो प्रदर्शनको आशा गर्न सक्ने अवस्था नरहेको पनि उनले बताए । ‘छनोटमा प्रशिक्षक नै छैनन्,’ ती सदस्यले भने, ‘एकातिर प्रशिक्षक बिना नै खेलाडी छनोट गरिएको छ भने अर्कोतिर छनोट भएका खेलाडीलाई कसले प्रशिक्षण दिने भन्ने अन्योल पनि कायमै छ ।’ उनका अनुसार बेलाबखत आयोजना गरिने प्रतियोगिताका क्रममा मात्रै सक्रियता देखाउने विभिन्न खेलका संघ र तिनका पदाधिकारीहरू अहिले खेलाडी खोज्ने तिनै खेलाडीबाट आठौं राष्ट्रिय खेलकुदमा जिल्लाको प्रतिनिधित्व गराउने दाउमा छन् ।
जिल्ला टेबुलटेनिस संघले प्रशिक्षक बिना नै महिला पाँच र पुरुष पाँच गरी १० जना खेलाडी छनोट गरेको छ । प्रशिक्षक शिवनारायण श्रेष्ठलाई पूर्वाञ्चल खेलकुद विकास समितिको निर्देशकको जिम्मेवारी दिइएपछि मोरङमा टेबुलटेनिस खेल प्रशिक्षकविहीन बनेको छ । प्रशिक्षक नभएपछि जिल्ला टेबुलटेनिस संघका पदाधिकारीले नै आठौं राष्ट्रिय खेलकुदमा सहभागिता जनाउने खेलाडी छनोट गरेका हुन् । यसअघि पनि खेलाडी छनोटका क्रममा संघ विवादमा फस्दै आएको थियो । यसपटक खेलाडी छनोटमा विवाद नदेखिए पनि प्रशिक्षक नभएका कारण चयनमा समस्या आएको स्रोत बताउँछ ।
जिल्ला प्रशिक्षक सागर पोखरेलले गत असोजमा छाडेपछि बक्सिङ संघ मोरङ पनि प्रशिक्षकविहीन बनेको छ । पोखरेलको राजीनामापछि अर्को प्रशिक्षकको व्यवस्था गरिएको छैन । प्रशिक्षकबिना नै संघले पनि राखेपको कोटाअनुसार आठौं राष्ट्रिय खेलकुदका लागि तीनजना खेलाडी छनोट गरेको हो । संघका जिल्ला अध्यक्ष रामबाबु पासवानकै अगुवाइमा खेलाडी छनोट गरिएको जनाइएको छ ।
बक्सिङ संघले ८० केजी तौलसमूहमा वसन्त बुढाथोकी र चिराग आरोरालाई प्रतिस्पर्धाका आधारमा छनोट ग¥यो । काठमाडौंमा रहेका आयुषकुमार केसीलाई भने निर्विरोध छनोट गरिएको छ । काठमाडौंमा रहेका कारण केसीलाई छनोट प्रक्रियामा सहभागी नगराइएको अध्यक्ष पासवाले बताए । संघले यसअघि १३ जना खेलाडी प्रशिक्षणमा रहेको जानकारी दिँदै आएको थियो । तर, छनोट प्रतियोगितामा भने बुढाथोकी र अरोरालाई मात्रै सहभागी गराइयो ।
‘खेलाडी छनोटमा हामीलाई पर्याप्त बजेट उपलब्ध भएन । जम्मा दुई हजार रुपैयाँ मात्रै पाइयो,’ अध्यक्ष पासवानले भने, ‘सीमित रकम, स्रोत र साधनको अभावमा जस्तो सकियो त्यस्तै छनोट गरियो । खेलाडी छनोट पनि प्रशिक्षकविहीन अवस्थामै गर्नु प¥यो ।’ उनले बजेट अभावकै कारण संघले प्रशिक्षक नियुक्ति गर्न नसकेको दाबी पनि गरे । सरकारको बेवास्ताकै कारण नेपालमा खेलकुद क्षेत्र निकै पछि परेको पासवानको गुनासो छ ।
जिल्ला खेलकुद विकास समितिका अध्यक्ष अमात्यले भने राखेपले चाँडै प्रशिक्षकको विषयमा निर्णय लिने अपेक्षा गरिएको बताए । ‘जिल्लामा सम्बन्धित खेलका प्रशिक्षकको अभाव देखिएको छ’, उनले भने, ‘खेलाडी छनोटमा अन्य खेलका प्रशिक्षकलाई पालो गरेर निर्णायकको भूमिकामा राख्नुपर्ने अवस्था छ ।’ अमात्यले प्रशिक्षक अभावका कारण खेलाडी छनोटमा समस्या भइरहेको स्वीकार गरे ।
मोरङबाट २२ वटा खेलको खेलाडी छनोट गर्नुपर्ने भए पनि टेबुलटेनिस, बास्केटबल, कबड्डी, एथलेटिक्स, बक्सिङ, ब्याडमिन्टन, खो खोलगायतका खेलमा प्रशिक्षक छैनन् । यी खेलका खेलाडी प्रशिक्षकबिना नै छनोट गर्ने काम भइरहेको बताइएको छ । कराँतेमा भने आठजना प्रशिक्षक रहेको जानकारी अध्यक्ष अमात्यले दिए । कराँतेका २१ जना खेलाडी राष्ट्रिय प्रतियोगिताका लागि छनोट गरिएको छ ।
बास्केटबलमा खेलाडी छनोट स्वयंसेवक प्रशिक्षकका रूपमा रहेका सरोज लम्सालले गराएका हुन् । बास्केटबलमा १० जना खेलाडी र दुईजना वैकल्पिक खेलाडी छनोट गरिएको छ । लम्सालले विराटनगरमा बास्केटबल सबैभन्दा कान्छो खेल भएको बताए । उनले भने, ‘बास्केटबल यहाँको सबैभन्दा कान्छो खेल हो तर, दर्शक र खेलाडीको आकर्षण भने यो खेलमा निकै छ ।’
बास्केटबलको खेलाडी छनोटका लागि भने पाँच हजार रुपैयाँ प्राप्त भएको उनले बताए । समितिका कार्यालय प्रमुख देवराज कटवालका अनुसार मंसिर २१ गतेसम्म जिल्लामा खेलाडी छनोट प्रक्रिया चल्नेछ । खेलाडी छनोटका लागि पाँच लाख ९० हजार रुपैयाँ प्राप्त भएको उनले बताए । प्राप्त भएको पैसा खेल सामग्री र कार्यक्रम सञ्चालनका लागि छुट्ट्याइएको कटवालको भनाइ छ ।
प्रतिक्रिया दिनुहोस !
