ओट्टावा : चीनको दूरसञ्चार कम्पनी ह्वावेका संस्थापककी छोरी एवं कम्पनीकी उच्च अधिकारी मङ वानचाउलाई क्यानडामा पक्राउ गरिएको छ । उनलाई अमेरिका सुपुर्दगी गर्ने तयारी भइरहेको क्यानडाका अधिकारीहरूले बताएका छन् ।
चीनले भने उक्त पक्राउ रदुर्व्यवहारप्रति आपत्ति जनाएको छ । मङ वानचाउ हाल ह्वावेकी प्रमुख वित्तीय अधिकृत हुन् । इरानमाथिको अमेरिकी नाकाबन्दीको ह्वावेले अवज्ञा गरेको आरोपमा अमेरिकी अधिकारीहरूले अनुसन्धान शुरु गरेको बताइएको छ । अमेरिकी गुप्तचर अधिकारीहरूले ह्वावेका गतिविधिमाथि निगरानी गरिरहेको र उक्त कम्पनी राष्ट्रिय सुरक्षाका दृष्टिले खतरापूर्ण रहेको बताउँदै आएका छन् ।
अमेरिका र चीनबीच जारी व्यापारिक तनाबका सन्दर्भमा तीनमहिने युद्धबिराम गरेको केही दिनभित्रै नयाँ विवाद सतहमा आएको छ । दुबै देशका व्यापार मध्यस्थकर्ताहरूमाथि तीन महिनाभित्र असमझदारी हटाउनुपर्ने गहन जिम्मेवारी छ । मङको गिरफ्तारीसँगै एशियाली शेयरबजारमा त्यसको असर देखिएको छ । साङघाई र हङकङको शेयरबजारमा गिरावट आउनुका साथै प्रविधि क्षेत्रको शेयरमा मन्दी छाएको छ । मध्याह्नसम्म साङघाई स्टक एक्सचेन्ज १. ३ र हङकङ स्टक २.६ प्रतिशतले घटेको छ ।
‘चीनले हाम्रो राष्ट्रिय सुरक्षा चासोलाई सुझबुझपूर्ण किसिमले बेवास्ता गरिरहेको छ र अमेरिका तथा हाम्रा गठबन्धन राष्ट्रहरूले यस्तो परिस्थितिलाई टुलुटुलु हेरेर बस्न सक्दैनन्’, अमेरिकी सिनेटर बेन सास्सेले भने । उनले वक्तव्य जारी गर्दै कहिलेकाहीँ चिनियाँ अतिक्रमण पूरै राज्य–प्रवद्र्धित देखिएको त कहिले चीनका तथाकथित निजी कम्पनीहरूले यो कार्य गरिरहेका दाबी गरेका छन् ।
क्यानाडको न्याय मन्त्रालयले मङलाई भ्यानकुभरबाट डिसेम्बर १ तारिखमा गिरफ्तार गरिएको जनाएको छ । मन्त्रालयले मङलाई अमेरिका सुपुर्दगी गर्न आग्रह गरेको बताएको छ । मङका पिता एवं ह्वावेका संस्थापक रन चङफाई चिनियाँ जनमुक्ति सेनाका पूर्वइन्जिनियर हुन् ।
ओट्टावास्थित चिनियाँ राजदूतावासले मङलाई तत्काल रिहा गर्न आग्रह गरेको छ ।ह्वावेले मङले कुनै गलत कार्य गरेको बारेमा जानकारी नभएको बताउँदै आरोपका बारेमा ज्यादै कम जानकारी दिइएको बताएको छ । कम्पनीद्वारा जारी वक्तव्यमा भनिएको छ, ‘ह्वावेले सबै किसिमका कानुनी प्रक्रिया पूरा गरिरहेको छ ।
राष्ट्रसंघ, अमेरिका र यूरोपेली यूनियनबाट जारी भएका प्रतिबन्ध एवं नियम पूर्ण पालना गरिएको छ ।’ वालस्ट्रिट जर्नलले अप्रिलमा अमेरिकी न्याय मन्त्रालयले इरानविरुद्ध अमेरिकी प्रतिबन्धलाई ह्वावेले उल्लंघन गरिरहेको भन्दै छानबिन थालेको समाचार प्रकाशन गरेको थियो । एएफपी
प्रतिक्रिया दिनुहोस !
