एजेन्सी : ला लिगामा खराब प्रदर्शनका कारण पछि परिरहेको स्पेनिस पावर हाउस रियल मड्रिड पछिल्ला खेलमार्फत लयमा फर्कने प्रयास गरिरहेको छ । आइतबारको खेलमा सोसाइडड डिपोर्टिभ हुयस्कामाथि १–० को जित निकाल्दै अघि बढ्न सफल भएको छ ।
हुयस्काको घरेलु मैदानमा भएको खेलमा रियलको जित निकै संघर्षपूर्ण रह्यो । ८ औं मिनेटमा ग्यारेथ बेलले गरेको १ गोल नै निर्णायक बन्यो । यसपछिको पूरा समय रियल मड्रिड स्कोर जोगाउनका लागि मात्रै सीमित भयो थप गोल गर्ने सकेन । अंक तालिकाको पुच्छारमा रहेको हुयस्का १५ खेल खेल्दा १ जित र ४ मा बराबरी नतिजा निकालेको छ ।
यस जितसँगै रियल मड्रिड अंक तालिकामा पनि एक स्थानमाथि उक्लिएको छ । १५ खेलबाट २६ अंक बनाएको रियल पाँचौंबाट चौथो स्थानमा उक्लिएको छ । निकै पछि परेको रियल मड्रिडले पछिल्ला दुई खेलमा जित निकाली दुई स्थान सुधार गरेको हो । छैटौं स्थानमा रहेको रियलले गत हप्ता भ्यालेन्सियालाई २–० पराजित गरी पाचांै स्थानमा उक्लिएको थियो ।
१५ खेलबाटै ३१ अंक बनाएको बार्सिलोना शीर्ष स्थानमा छ । समान खेलबाट २८ अंक रहेका आलाभेज र एथ्लेटिको मड्रिड दोस्रो र तेस्रो स्थानमा छन् ।
प्रतिक्रिया दिनुहोस !
