इटहरी : प्रहरीको गोली लागेर सुनसरीमा एक व्यक्तिको ज्यान गएको छ । कोसी गाउँपालिकास्थित तस्करले प्रयोग गर्ने रुटमा प्रहरीको गस्तीमाथि गोली प्रहार भएको र त्यसको जवाफी कारबाहीमा एक अज्ञात व्यक्तिको ज्यान गएको प्रहरीले पुष्टि गरेको छ । सुनसरी प्रहरी प्रमुख एसपी राजन अधिकारीका अनुसार आइतबार राति ८ः२१ बजेको समयमा प्रहरी गस्तीमाथि फायरिङ भएको थियो ।
नेपाल–भारत सीमाभन्दा करिब ३ सय मिटर उत्तरतर्फको मुसहरी टोल नजिक घटना भएको हो । एसपी अधिकारीले मृतकको पहिचान हुन नसकेको जानकारी दिए । उनका अनुसार गोली लागि मृत्यु हुने व्यक्ति तराई मुलका जस्तो देखिने अन्दाजी ३५ वर्षका छन् । मृतकको साथबाट गोली लोड भएको पेस्तोल फेला परेको र नजिकै लोड भएको अर्को कटुवा पेस्तोल पनि भेटिएको प्रहरीले जनाएको छ ।
तस्करहरुले प्रयोग गर्ने रुटमा राति करिब ५ जना हतियार धारी जस्ता देखिने व्यक्तिलाई रोक्न खोज्दा एक्कासी प्रहरीमाथि फायरिङ भएको बताइएको छ । प्रहरीका अनुसार जवाफ कारवाहीमा मारिएका व्यक्तिको कुम, ढाड र पेटमा गोली लागेको छ । मृतकको शव पोस्टमार्टमका लागि धरानस्थित विपी प्रतिष्ठान पुया¥इएको छ ।
भुलसुधार : यसअघि यस समाचारमा सुनसरीका प्रहरी प्रमुखको नाम एसपी राजन अधिकारी हुनु पर्नेमा अन्यथा भएकाले सच्चाइएको छ - सम्पादक
प्रतिक्रिया दिनुहोस !
