काठमाडौं : भूमि व्यवस्था तथा गरिबी निवारण मन्त्री पद्मा अर्यालले नेपाली महिलाहरु अब आरक्षणमा मात्रै सिमित नभएर मूलधारको नेतृत्व गर्न पनि सक्षम रहेको बताएकी छन् ।
विभिन्न आन्दोलनमा महिलाको सहभागिता तथा नेतृत्वदायी भुमिकाको प्रसंग कोट्याउँदै अर्यालले महिला आरक्षणमै सिमित भएर बस्न नहुने आह्वान समेत गरेकी छन् ।
राज्य संचालन तथा नीति निर्माण तहमा पनि महिला पुग्न सक्षम रहेको भन्दै आफैँलाई कम आंकलन गर्न नहुने उनको भनाइ थियो । लैंगिक हिंसा विरुद्धको १६ दिने अभियानको समापन समारोहलाई सम्बोधन गर्दै काठमाडौंको बसन्तपुरमा मन्त्री अर्यालले यस्तो बताएकी हुन् । भाषणको क्रममा अर्यालले बलात्कारपछि हत्या गरिएकी निर्मला पन्तका हत्यारालाई कुनै पनि हालतमा सरकारले कठघरामा ल्याएरै छोड्ने ठोकुवा पनि व्यक्त गरिन् ।
सामुदायिक वन उपभोक्ता महासंघ (फेकोफन)को आयोजनामा बसन्तपुरमा १६ दिने अभियानको औपचारिक समापन गरिएको हो ।
यस क्रममा सामुदायिक वन उपभोक्ता महासंघ अध्यक्ष भारती पाठकले लैंगिक हिंसा विरुद्धको अभियान १६ दिनमा मात्रै सिमित नभएर हिंसा अन्त्य नहुन्जेल जारी रहने बताइन् । देशभरका महिलाले यस अभियानमा साथ दिएकोमा सबैलाई उनले धन्यवाद ज्ञापन गरेकी थिइन् ।
प्रतिक्रिया दिनुहोस !
