भरतपुर : राप्रपाका अध्यक्ष कमल थापाले कांग्रेससँग सहकार्य गरेर नेपाललाई हिन्दू राष्ट्रको रूपमा पुनर्स्थापना गर्न सकिने दाबी गरेका छन् । भरतपुरमा बुधबार पत्रकारसँग कुरा गर्दै उनले भने, ‘कांग्रेसका केही नेताले पनि हिन्दू धर्मको विषयमा वकालत गर्दै आएकाले धर्मको विषयमा सहकार्य गरेर अगाडि बढ्न सकिन्छ ।’
कांग्रेस र कम्युनिष्टप्रति जनतामा वितृष्णा बढ्दै गएकाले हिन्दू धर्मका लागि जनताले राप्रपालाई नै विश्वास गर्ने उनको भनाइ छ । ‘किनकी फरक धारको वैचारिक शक्ति बन्ने क्षमता र आवश्यक तत्व अब राप्रपासँग मात्रै छ’, उनले भने । २०६२÷६३ पछि नेपालमा संगठित र योजनावद्ध तरिकाबाट धर्म परिवर्तन गर्ने काम बढ्दै गएकाले त्यसलाई रोक्न आवश्यक रहेको उनले बताए । ‘यो १२ वर्षको अवधिमा करिब १० लाख जनतालाई भ्रम सिर्जना गरेर धर्म परिवर्तन गराइएको अनुमान छ’, उनले भने, ‘जुन कार्य नेपालको संविधानविपरित छ ।’ स्वेच्छाले धर्म परिवर्तन गर्न पाउने भए पनि भ्रम छरेर जबरजस्ती परिवर्तन गराएर नेपालको राष्ट्रिय पहिचानलाई संकटमा पारेको उनको भनाइ छ ।
‘जबरजस्ती धर्म परिवर्तनले संविधानमा उल्लेख भएको धर्म निरपेक्षताको उपहास भएको छ’, उनले भने, ‘अर्कोतर्फ सनातन हिन्दू धर्ममा आस्था राख्ने नेपालीलाई चुनौती दिइरहेको छ ।’ सरकार स्वयं जबरजस्ती धर्म परिवर्तन गराउने खेलमा लागेको उनले आरोप लगाए । प्रधानमन्त्रीजस्तो सम्मानित पदमा बसेर एउटा धर्म प्रचारक संस्थाले आयोजना गरेको विवादास्पद कार्यक्रममा उपस्थिति हुनु लज्जास्पद भएको उनले बताए । नेपाली जनताकै साथ र सहयोगबाट नेपाललाई हिन्दू राष्ट्र बनाउन सकिने अध्यक्ष थापाले बताए ।
‘कथम्कदाचित जनमत संग्रह भइहाल्यो भने पनि जनताले हिन्दू राष्ट्रको पक्षमै भोट हाल्नेछन्’, उनले भने । तर, धर्मजस्तो संवेदनशील विषयमा जनमत संग्रह गरेर राष्ट्रलाई विभाजित गर्न नहुने उनको भनाइ छ । ‘राजनीतिक सहमति र समझदारीको आधारमै हिन्दू राष्ट्र कायम गराउनुपर्छ’, उनले भने, ‘यदि सहमति नै हुन सकेन भने विकल्पको रूपमा बल्ल जनमत संग्रह गर्न सकिन्छ ।’
पार्टी एकता हुन्छ
थापाले पशुपति राणा र डा. प्रकाशचन्द्र लोहनी नेतृत्वको राप्रपासँग पनि छिट्टै पार्टी एकता हुने दोहो¥याए । ‘समान विचारधारा भएका दलहरूसँग पार्टी एकता गर्न सकिन्छ’, उनले भने, ‘पशुपतिजी र प्रकाशजीसँग प्रायः सबै विषयमा सहमति भइसकेको छ । उहाँहरूले गृहकार्यको समय मागेकाले मात्रै हामी रोकिएका हौं ।’ यसअघि राप्रपाले कात्तिक २६ गते नै पार्टी एकताको मिति तोकेको थियो । ‘उहाँहरूको गृहकार्य सकिएपछि हामी एकता गर्नेछौं’, उनले भने, ‘समान विचारधारा भएका पार्टीका लागि राप्रपामा सधैं ढोका खुला छ ।’
पार्टी एकता गर्दै फुट्दै गरेको राप्रपामा अबको एकतापछि पनि पार्टी फुटेमा राप्रपालाई जनताले नपत्याउने हुँदा गहिरो छलफल गरेर पार्टी एकता गर्न खोजिएको उनले बताए । ‘अब पनि पार्टी फुट्यो भने हामीलाई कसैले पनि पत्याउँदैन’, उनले भने, ‘जानाजान आफैं सिद्धिने काम गर्न त भएन । त्यसैले लामै समय लगाएर भए पनि कहिल्यै नफुट्ने गरी एकता गर्ने तयारीमा छौं ।’
प्रतिक्रिया दिनुहोस !
