काठमाडौं : सरकारले साझा सहकारीबाट साना किसानले लिएका सबै ऋण मिनाहा गरेको छ । तत्कालीन साझा कृषि सहकारीबाट किसानले करिब ३० करोड ऋण लिएका थिए । मन्त्रिपरिषद्को सोमबारको बैठकले यो निर्णय गरेको हो । ऋण मिनाहाबाट ६ सयदेखि सात सय परिवार लाभान्वित हुने सरकारका प्रवक्ता सञ्चारमन्त्री गोकुल बास्कोटाले जानकारी दिए ।
कृषि विकास बैंकले साझा सहकारीमार्फत करिब ३० करोड कर्जा प्रवाह गरेको थियो । ३५ वर्ष अघिको यो ऋणमा साँवाबाहेक ब्याजमात्रै करिब एक अर्ब पुगेको कृषि बैंकका प्रवक्ता हिमलाल पौडेलले जानकारी दिए । ऋण मिनाहसँगै ऋण तिर्न नसकेर धितो बन्धक भएका किसानको धितोसमेत फुकुवा हुनेछ ।फेरि अर्को अध्यादेशको तयारी
संसद् अधिवेशनको तयारी भइरहेका बेला सरकारले प्रहरी समायोजन अध्यादेश जारी गर्ने गृहकार्य थालेको छ । मन्त्रिपरिषद्को सोमबारको बैठकले प्रहरीलाई केन्द्र र प्रदेशमा समायोजन गर्न बनेको अध्यादेश परामर्शका लागि लोकसेवा आयोगमा पठाएको छ ।
सञ्चारमन्त्री एवं सरकारका प्रवक्ता गोकुल बास्कोटाले मन्त्रालयमा बिहीबार आयोजित पत्रकार सम्मेलनमा प्रहरी समायोजनका अप्ठ्यारा फुकाउन अध्यादेश ल्याउन लागिएको बताए ।
सरकारले गत साता कर्मचारी समायोजन अध्यादेश जारी गरेको थियो । प्रदेशभित्रको शान्ति सुव्यवस्था कायम गर्न तथा केन्द्र र प्रदेशबीच समन्वय गर्न प्रहरी समायोजन आवश्यक भएको उनले बताए । अन्तरप्रदेश परिषद्को हालै सम्पन्न बैठकमा मुख्यमन्त्रीहरूले प्रदेश प्रहरी नहुँदा परेको अप्ठ्यारोबारे गुनासो गरेका थिए ।
अध्यादेश जारी गर्नुभन्दा संसद् अधिवेशन बोलाउनेतर्फ सरकार लाग्नुपर्नेमा सभामुख कृष्णबहादुर महराले जोड दिएका छन् । सभामुख महराले भने, ‘कानुन बनाउने भनेको संसद्ले हो । सरकारले संसद्मै विधेयक ल्याएर कानुन निर्माण गर्नु उपयुक्त हुन्छ ।’
गल्ती भेटिए कारबाही
अस्ट्रेलियाका लागि राजदूत लक्की शेर्पाबारे अनुसन्धान भइरहेको र गल्ती भेटिए कारबाही हुने बास्कोटाले बताए । शेर्पामाथि विभिन्न आरोप लागपछि नेपाल बोलाएर उनीमाथि अनुसन्धान चलिरहेको उनको भनाइ छ । ‘आरोप सत्य भए कारबाही हुन्छ’, बास्कोटाले भने, ‘उहाँमाथि लागेको आरोपबारे सरकार जानकार छ । सत्यता के हो भनेर सम्बन्धित व्यक्तिसँग सोधपुछ पनि चलिरहेको छ ।’
प्रतिक्रिया दिनुहोस !
