१४ दिनदेखि लामा वेपत्ता

डोल्पा : डोल्पाका एकजना लामा १४ दिनदेखि वेपत्ता छन्। शे-फोक्सुण्डो गाउँपालिका वडा न १ का ३३ वर्षीय तेन्जीङलुण्डुप लामा १४ दिनदेखि वेपत्ता भएका हुन्। गएको मंसिर १६ गते सदरमुकाम दुनैबाट आफ्नो घर जान हिँडेका लामा सोही गाउँपालिकाको साबिकको फोक्सुण्डो गाविसको छोक्लोफुक भन्ने ठाउँबाट वेपत्ता भएको वडा न १ का अध्यक्ष जिग्मेछिरिङ लामाले जानकारी दिए। 

लामा घरमा नपुगेपछि आफन्तले जिल्ला प्रहरी कार्यालयमा खोजी गरिदिनका लागि मंसिर २७ गते निवेदन दिएको वडा अध्यक्ष लामाले बताए। उनले भने,' निवेदन दिएको एक साता बितिसक्दा पनि खोजी नगरेपछि फेरि निवेदन दिएका हौं।'
 

वेपत्ता लामाको खोजीमा प्रहरीले खासै चासो नदिएको आफन्तको आरोप छ। तर यता प्रहरीले भने निरन्तर खोजीको प्रयास भइरहेको बताएको छ।