भक्तपुर : भक्तपुरका महिला कर्मचारी, नर्सलगायतलाई आत्मरक्षा (सेल्फ डिफेन्स) सम्बन्धी दुईदिने तालिम दिइएको छ ।
राष्ट्रिय खेलकुद परिषद्को समन्वयमा नेपाल सेल्फ डिफेन्स एसोसियसनले भक्तपुरका दुई दर्जन बढी महिलालाई आत्मरक्षासम्बन्धी तालिम दिएको हो ।
भक्तपुरको सिद्धि स्मृति प्रतिष्ठानको सहयोगमा भएको तालिममा एसोसियसनका प्रमुख प्रशिक्षक सञ्जु महर्जन नेतृत्वको टोलीले सहजीकरण गरेको थियो । जसमा महर्जनको टोलीमा एसोसियसनका प्रशिक्षकहरु पद्मा खयरगोली, राधिका ऐर हमाल, रोजिना लोहला र रवीन्द्र श्रेष्ठ थिए ।
तालिममा महिलाले सार्वजनिक सवारीसाधन, कार्यालयलगायत सार्वजनिक क्षेत्रमा हुनसक्ने महिला हिंसाका क्रममा आत्मरक्षा गर्ने विधिबारे प्रदर्शन गर्दै सीप सिकाइएको थियो ।
तालिममा विनाहातहतियार हात खुट्टाको मद्दतमा बलभन्दा बुद्धिको प्रयोग गरी आफूमाथि हुने हिंसा र हमलाको प्रतिकार गरी सुरक्षित हुने विधिबारे सीप र ज्ञान दिइएको मुख्य प्रशिक्षक महर्जनले बताइन् ।
आत्मविश्वासको कमीले गर्दा महिलाहरु हिंसा, बलात्कारदेखि अपहरणसम्म हुने घटना बढेकाले महिलाहरुमा आत्मविश्वास जगाइ आत्मरक्षा गर्ने विधि सिकाउन एसोसियसनले देशव्यापी अभियान नै सञ्चालन गरेको बताइएको छ ।
यसअघि काठमाडौं, ललितपुर, काभ्रे, बाँके, कैलाली र कञ्चनपुरमा यस्तै तालिम सम्पन्न गरिएको आयोजक संस्थाले बताएको छ । माघ १० गतेभित्र बाँकी १२ जिल्लामा उक्त तालिम सञ्चालन गरिने प्रशिक्षक पद्मा खयरगोलीले जानकारी दिइन् ।
प्रतिक्रिया दिनुहोस !
