पहिलो पटक फ्रेन्चाइज क्रिकेट प्रतियोगिताको उपाधि जितेकोमा खुसी लागेको छ । प्रतियोगिताको उद्घाटन खेलमा विराटनगर वारियर्ससँग पराजित भएपछिका कुनै पनि खेल नहारेरै उपाधि जित्न सफल भएका छौं । खेलाडी र कप्तानको हैसियतमा यो उपाधिमा म खुसी छु । मलाई हामी उपाधिका लागि लायक थियौं र छौं जस्तो लाग्छ ।
किनभने जसरी खेलाडीहरूले मेहनत गरे,त्यसअनुसार सबै खेलमा राम्रो नतिजा निस्किएको थियो । हरेक खेलमा फरक÷फरक म्याच ‘विनर’ रहे । त्यसमा पनि युवा खेलाडीहरू नै रहे । यी ईपीएलको यो संस्करणले दिएको सकारात्मक पक्ष हो । दुई खेलपछि सन्दीप बीचैमा अस्ट्रेलिया गए । त्यसपछि गौरभ तोमारले पनि बलिङ गर्न पाएनन् ।
यो कारणले हामीसँग बलरको कमी देखियो । प्रत्येक खेलमा हामीले थोरै बलरलाई लिएर खेल्यौ । फाइनलमा विशेष त्यस्तो योजना केही थिएन । कसरी हुन्छ उनीहरूलाई राम्रोसँग खेल्न नदिने नै योजना थियो । सबै खेलाडीको मेहनतमा योजनाअनुसार जित सम्भव भयो ।
ललितपुरलाई उपाधि
ललितपुर प्याट्रियट्सले प्रतिष्ठित फ्रेन्चाइज क्रिकेट प्रतियोगिता एभरेस्ट प्रिमियर लिग (ईपीएल) को उपाधि जितेको छ । शनिबार भएको फाइनलमा भैरहवा ग्लाडिएटर्सलाई १४ रनले पराजित गर्दै ललितपुर ईपीएलको नयाँ विजेता बनेको हो ।
ललितपुरसँग पराजित हुँदा भैरहवा ईपीएलको लगातार दोस्रो संस्करणमा फाइनलमा पुगेर उपाधिबाट वञ्चित भएको छ । गत संस्करणमा पनि भैरहवा पारस खड्का कप्तानीको विराटनगर वारियर्ससँग मात्रै एक रनले पराजित हुँदै उपाधिबाट चुकेको थियो ।
कप्तानको हैसियतमा यो उपाधिमा ज्ञानेन्द्र मल्लले शरद भेषावकरसँग बदला लिएका छन् । कर्पाेरेट संरचनामा भएको ईपीएलको सन् २०१६ को संस्करणमा ज्ञानेन्द्रको कप्तानीमा रहेको कलर एक्स फ्याक्टरलाई ४० रनले पराजित गर्दै शरदले पञ्चकन्या तेजबाट उपाधि जितेका थिए ।
त्यसको तीन वर्षपछि फेरि ईपीएलकै फाइनलमा भेट हुँदा ज्ञानेन्द्र सफल भए ।
कीर्तिपुरस्थित त्रिवि क्रिकेट मैदानमा टस हारी पहिले ब्याटिङ गरेको ललितपुरले १९.१ ओभरमा सबै विकेट गुमाउनुअघि एक सय ५५ रनको योगफल तय गरेको थियो । जवाफी ब्याटिङमा आएको भैरहवाले निर्धारित २० ओभरमा नौ विकेट गुमाउँदा एक सय ४१ रन मात्रै जोड्न सक्यो ।
ललितपुरलाई विजयी बनाउन युवा बलर योगेन्द्रसिंह कार्कीले अन्तिम ओभरमा निकै किफायती बलिङ गरे । अन्तिम ६ बलमा जितका लागि १७ रन आवश्यक रहेका बेला योगेन्द्रले मात्रै दुई रन खर्चंदा दुई रन आउटसहित तीन विकेट लिएपछि ललितपुरको जित निश्चित बनेको थियो ।
त्यसअघि भारतीय ब्याट्सम्यान जयकिशन कोल्सावालाले ५२ बलमा ५७ रनको अर्धशतकीय पाली खेल्दा ललितपुरले प्रतिस्पर्धात्मक योगफल तय गरेको थियो । कोल्सावालाले आफ्नो पालीमा समान तीन छक्का र तीन चौका प्रहार गरेका थिए ।
त्यसपछि युवा ब्याट्सम्यान सन्दीप जोहराले ११ बलमै २४ रन प्रहार गर्दा अर्का प्रारम्भिक ब्याट्सम्यान गौरभ तोमारले १९ बलमा २३ रन जोडे । सन्दीपले आफ्नो पालीमा दुई छक्का र एक चौका प्रहार गर्दा तोमारले एक छक्का र तीन चौका प्रहार गरेका थिए ।
कोल्सावाला र तोमारले ललितपुरका लागि पहिलो विकेटमा ४१ रनको साझेदारी गर्दै ललितपुरलाई राम्रो सुरुआत दिएका थिए । टोलीका लागि सात÷सात बलको सामना गरेका कुशल भुर्तेल र कप्तान ज्ञानेन्द्र मल्लले क्रमशः ११ र १० रन जोड्दा अन्य खेलाडीले भने दोहोरो अंकमा रन जोड्न सकेनन् ।
बलिङतर्फ योगेन्द्रसँगै ललितपुरका ललितनारायण राजवंशीले महत्र्वपूर्ण विकेट लिँदा भैरहवा लक्ष्यसम्म पुग्नुअघि नै रोकिएको थियो ।
भैरहवाका लागि प्रारम्भिक ब्याट्सम्यान प्रदीप ऐरीले २२ बलमा ३४ रन जोड्नबाहेक अन्य खेलाडीले गतिलो प्रदर्शन गर्न सकेनन् । उनले आफ्नो पालीमा एक छक्का र चार चौका प्रहार गरेका थिए ।
त्यसबाहेक युवा खेलाडी कुशल मल्लले आठ बलमै एक छक्काको मद्दतमा १६ रन प्रहार गर्दा भारतीय खेलाडी रभिइन्दर सिंहले ३२ बलमा २९ रन जोडे । यस्तै डच खेलाडी र्यान टेन डोस्काटे र शरद भेषावकरले समान १४÷१४ रन जोड्दा आरिफ शेख १२ र मोहम्मद नाभिदले १० रन जोडेका थिए ।
भैरहवालाई लक्ष्यसम्म पुग्नुअघि नै रोक्नका लागि ललितले सर्वाधिक तीन विकेट लिएका थिए । ललितले चार ओभरमा १७ रन मात्रै खर्चिएका थिए । उनीबाहेक योगेन्द्रसँगै पवन सर्राफले दुई÷दुई विकेट लिएका थिए ।
भैरहवाका कृष्ण कार्कीले दुई ओभरमै १५ रन खर्चिएर तीन विकेट लिएका थिए । यस्तै मोहम्मद नाभिद र डोस्काटेले दुई÷दुई विकेट लिए पनि टोलीको जित सम्भव भएन ।
प्रतिक्रिया दिनुहोस !
