वासिङटन : इसाईहरूको पर्व क्रिसमसका बेला अमेरिकी कर्मचारीले तलब पाएका छैनन् । सोमबार तेस्रो दिन पनि कर्मचारीले तलब नपाएपछि कार्यालय बन्द भएको अधिकारीहरूले जनाएका छन् ।
अमेरिकी संसद् र राष्ट्रपति डोनाल्ड ट्रम्पबीच मेक्सिको सिमानामा पर्खाल निर्माणका लागि बजेटमा देखिएको गतिरोध समाधान नभएपछि उनीहरूले तलब पाउन नसकेका हुन् । बजेटमा रहेको असहमति अन्त्य गर्न अमेरिकी सिनेटरहरूबीच भएको छलफल निष्कर्षविहीन भएपछि सरकारी काम आंशिक रूपमा प्रभावित भएको हो ।
संघीय सरकार अन्तर्गतका झण्डै चार लाख कर्मचारीहरू यसबाट मर्कामा परेका छन् । अमेरिकी राष्ट्रपति डोनाल्ड ट्रम्पले सरकारी कामकाज सञ्चालनका लागि विभिन्न कार्यालयलाई दिइने कोषबाट सीमा क्षेत्रमा बनाउने भनिएको पर्खालका लागि छुट्याइनुपर्नेमा जोड दिएपछि समस्या भएको हो । ट्रम्पले चुनावी अभियानका बेला मेक्सिकोसँगको सीमा क्षेत्रमा गैरकानुनी रूपमा आप्रवासीको प्रवेश रोक्न पर्खाल बनाउने बताएका थिए । त्यो काम अहिलेसम्म शुरु हुन सकेको छैन ।
ट्रम्पले आफ्नो चुनावी वाचा पूरा गर्नका लागि सरकारी खर्चको कोषबाट रकम जुटाउन खोजेका हुन् । ट्रम्पले पर्खालका लागि ५ अर्ब ७० करोड अमेरिकी डलर छुट्याउनुपर्ने बताउँदै आएका छन् । यसमा सिनेट तथा हाउसका सदस्य भने सहमत हुन सकेका छैनन् ।
नयाँ सहमति नभएसम्म अमेरिका सरकारका एक चौथाइ संघीय कार्यालयको दैनिक कार्यसञ्चालका लागि चाहिने रकम अभाव भएको छ । यसका कारण डिपार्टमेन्ट अफ होमल्यान्ड सेक्युरिटी, यातायात, कृषि, विदेश र न्याय मन्त्रालयअन्तर्गतका कार्यालयका काम बन्द भएका छन् ।
खर्च अभावमा राष्ट्रिय निकुञ्ज तथा जंगलसँग सम्बन्धित कार्यालयका काम पनि रोकिएका छन् । सहमति हुन नसकेपछि क्रिसमस मनाउन अमेरिकी सांसदहरू घर तर्फ लागेका छन् । राष्ट्रपति डोनाल्ड ट्रम्पले पेश गरेको बजेट पारित नभएपछि विवाद चर्किरहेका बेला सांसदहरू विदामा गएका हुन् । सन् २०१८ मा सरकारी कार्यालयमा बजेट अभावका कारण आंशिक रूपमा काम रोकिएको घटना यो पहिलो भने होइन । यसै वर्षमा अमेरिकी सरकारी कार्यालयमा कामकाज ठप्प भएको यो तेस्रोपटक हो ।
प्रतिक्रिया दिनुहोस !
