जनप्रतिनिधिलाई दुबै हातमा लड्डु : एक हातमा तलब, अर्को हातमा पेन्सन

बाजुरा : बाजुरा जिल्लाका स्थानीय तहमा निर्वाचित भएका जनप्रतिनिधिले दोहोरो सुविधा लिने गरेको पाइएको छ । उनीहरुले जनप्रतिनिधिको हैसियतमा भत्ता लिनुका साथै सरकारी कर्मचारी सेवाबाट निवृत्तिभरण पनि लिइरहेका छन् ।

स्थानीय स्वायत्त शासन ऐनमा एउटा ठाउँको मात्र सेवा लिन पाउनु पर्ने व्यवस्था भए पनि बाजुराका केही प्रतिनिधिले भने दोहोर सुविधा लिइरहेका हुन् ।

हिमाली गाउँपालिका–७ का वडाध्यक्ष जयबहादुर अधिकारी पुर्व सैनिक हुन् । उनले निवृत्तिभरण पनि लिइरहेका छन्, गाँउपालिकामा मासिक पाउनुपर्ने २० हजार पनि लिइरहेको गाउँपालिकाले जनाएको छ ।

यस्तै बुढिन्नदा नगरपालिका–२ का वडाध्यक्ष भीमबहादुर कार्की पुर्व भेटनरी जेटिए हुन् । उनले पनि दुबै सेवा लिइरहेका छन् । भीम बहादुर कार्कीले सरकारी पेन्सनसँगै नगरपालिकाबाट मासिक २२ हजार लिइरहेका छन् ।

कृषि कार्यलयका पूर्व अधिकृत तहका कर्मचारी विश्वराज पण्डित बडिमालिका नगरपालिका–१ का वडा सदस्य हुन् । उनले पनि दोहोरो सेवा लिँदै आएका छन् । नगरपालिकाबाट वडा सदस्यको हैसियतमा मासिक ६ हजार रकम बुझ्ने गरेका छन् उनले । बडिमालिका नगरपालिकाका लेखापाल पशुराम गिरी भने यसरी तलब दिन मिल्ने–नमिल्ने त्यसबारे जानकारी नभएको बताउँछन् ।

स्वामीकार्तिक गाँउपालिकाले भने दोहारो सुविधा लिने प्रतिनिधिलाई गाँउपालिकाबाट पाउनु पर्ने रकमको ५० प्रतिशत मात्रै दिइरहेको बताएको छ । वडा नम्बर ५ का वडाध्यक्ष विष्णुबहादुर शाही पुर्व प्रहरी र वडा नम्बर ४ का अध्यक्ष काशिराम कैला बाणिज्य बैंकका कर्मचारी हुन्, दुबै वडाध्यक्षलाई भने गाँउपालिकाबाट मासिक १० हजार मात्र दिने गरेको स्वामीकार्तिक गाँउपालिकाका निमित्त कार्यकारी कुबेर शाहीले बताए । उनीहरुले पाउने मासिक २० हजार हो । तर निवृत्तिभरण पनि पाउने भएकाले ५० प्रतिशत मात्र दिने गरेको बताइएको छ ।

कोष लेखा नियन्त्रण कार्यलय बाजुराका लेखापाल धनबहादुर थापा भने यस्तो अवस्थामा दुईमध्ये एक ठाँउको रकम मात्र लिन पाउने व्यवस्था रहेको बताउँछन् । ‘नैतिक आधारले एक ठाँउको मात्र रकम लिनुपर्ने हो, तर देशैभर अधिकांश जनप्रतिनिधिले दोहोरो सुविधा लिने गरेको देखिन्छ,’ थापाले थपे । यस्ता गतिविधि नियमन गर्ने निकाय नहुँदा जनप्रतिनिधिहरुले धमाधम दोहोरो सुविधा लिने गरेको पाइएको छ ।