अतिरिक्त हुलाक कर्मचारीको चेतावनी : निजामति सरह सुविधा नपाए आन्दोलनमा उत्रिन्छौँ
पुष ११, २०७५ बुधबार २०:०:०
काठमाडौं : अतिरिक्त हुलाक कर्मचारी केन्द्रीय संघर्ष समितिका अगुवा कर्मचारीहरुले आफूलाई निजामतिकरण नगरिए कडा आन्दोलनमा उत्रिने चेतावनी दिएका छन् ।
बुधबार काठमाडौंमा केन्द्रीय संघर्ष समितिले पत्रकार सम्मेलन गरेर अतिरिक्ति हुलाक सेवामा रहेर काम गरिरहेका कर्मचारीहरुलाई उचित पारिश्रमिक तथा निजामतिकरण नगरिए आन्दोलनमा उत्रिने चेतावनी दिएका हुन् ।
संघर्ष समितिका अध्यक्ष महेशलाल माझीले रिपोर्टर्स क्ल्वमा आयोजित कार्यक्रममा बोल्दै हुलाक नियमावली ऐन–२०३४ खारेजीको माग गरेका छन् । संघर्ष समितिका सदस्य हिक्मत घर्तीले निजामति कर्मचारी ऐनभित्र आफूहरुलाई अटाउनुपर्नेमा जोड दिएका छन् । उनले भने, ‘हामीले जीवनका महत्वपूर्ण समय यस सेवामा समर्पित गर्यौँ । आज सरकारले हामीलाई सौतेनी व्यहार गरिरहेको छ ।’
संघर्ष समितिका पदाधिकारीहरुले आफ्ना जायज मागहरु पूरा गर्न सरकारले आलटाल गरिरहेको भन्दै माग पूरा नभए आन्दोलनमा उत्रिने चेतावनी दिएका छन् । आन्दोलन रहर नभएर बाध्यता भएको भन्दै उनीहरुले अवकासपछि रित्तो हात फर्किनुपर्ने अवस्थाको अन्त्य गर्नुपर्ने पनि बताए ।
प्रतिक्रिया दिनुहोस !
