काठमाडौं : पल्सर सहिद स्मारक ‘ए’ डिभिजन लिग फुटबलमा बिहीबारको खेलमा मनाङ मस्र्याङ्दी क्लबले संकटा क्लबमाथि शानदार जित दर्ता गरेको छ।
पहिलो हाफमा १-० गोलले अग्रता लिएको मनाङले दोस्रो हाफमा थप २ गोल गरेको हो। खेलको अन्तिममा संकटाले सान्तवना गाेल फर्कायो। यो खेलमा ३-१ को शानदार जित दर्ता गरेसँगै मनाङले दुई खेलअगावै उपाधिमाथि कब्जा जमाएको छ।
बिहीबारको जितसँगै मनाङको ३३ अंक पुगेको छ। मनाङको निकट्तम प्रतिद्वन्द्वी संकटाको भने २५ अंकमात्र छ।
अब जारी सिजनको लिगमा यी दुबै टोलीले दुई-दुई खेलमात्र खेल्न बाँकी छ। बाँकी दुबै खेलमा मनाङ पराजित र संकटा विजयी भए पनि मनाङको उपाधि यात्रामा कुनै फरक पर्ने छैन।
बाँकी दुबै खेलमा पराजित भए मनाङको ३३ र बाँकी दुबै खेलमा विजयी भए संकटाको ३१ अंकमात्र हुनेछ। बिहीबारको जितसँगै मनाङले ११ खेलमा जित दर्ता गरेको छ।
प्रतिक्रिया दिनुहोस !
