काठमाडौं : मनाङ मर्स्याङ्दी क्लब पल्सर सहिद स्मारक ‘ए’ डिभिजन लिग च्याम्पियन बनेको छ । एन्फा मैदान सातदोबाटोमा बिहीबार भएको खेलमा मनाङले बलियो प्रतिद्वन्द्वी संकटा क्लबलाई ३–१ गोलले हराउँदै उपाधि जितेको हो । साविक विजेता मनाङ दुई खेलअगावै च्याम्पियन बन्यो ।
मनाङ लिगको ११औं चरणसम्म अपराजित रहने टोली हो । मनाङले यस उपाधिसँगै कीर्तिमान पनि रचेको छ । मनाङले यसअघि २०७० सालको सहिद स्मारक ‘ए’ डिभिजन लिग जितेको थियो । मनाङको लिगमा यो कीर्तिमानी आठौं उपाधि हो । मनाङले यसअघि २०४२–२०४३, २०४३–२०४४, २०४६, २०५७, २०६०, २०६२ र २०७० सालमा लिग जितेको थियो ।
शतप्रतिशत जित निकालेको मनाङले ११ खेलबाट ३३ अंक बनाएको छ । २५ अंक बनाएको संकटा दोस्रो स्थानमा छ । मनाङलाई हराउन सकेको भए संकटाको पनि उपाधि जित्ने सम्भावना कायम रहन्थ्यो । तर, संकटा मनाङसामु निरीह देखियो । उपाधिसँगै मनाङले ५० लाख रुपैयाँ पुरस्कार पाउनेछ । च्याम्पियन मनाङले सन् २०१९ मा आयोजना हुने एएफसी एसियन कप खेल्ने अवसरसमेत प्राप्त गरेको छ ।
संकटाविरुद्ध सशक्त प्रदर्शन गरेको मनाङले ४४औं मिनेटमा संकटाको आत्मघाती गोल सहयोगमा अग्रता लिएको थियो । मनाङका विशाल राईको कर्नर प्रहारलाई पन्च गर्दै बचाउने क्रममा संकटाका गोलरक्षकको आत्मघाती गोल भएको थियो । पहिलो हाफमा मनाङको दुईवटा प्रहार क्रसबारमा लागेर फर्किएको थियो । ८१औं मिनेटमा मनाङका पुजन उपरकोटीले मैदान छिर्नासाथ गोल गरे ।
उनले विशाल राईको कर्नर पासमा हेड गोल गरेका थिए । उनी सुजल श्रेष्ठको स्थानमा मैदान प्रवेश गरेका थिए । दोस्रो हाफमा एकपछि अर्को आक्रमण बुनेको मनाङले ८७औं मिनेटमा तेस्रो गोल गर्दै उपाधि पक्का बनाएको थियो । मनाङका लागि तेस्रो गोल अफ्रिकी खेलाडी एडेलाजा सोमिडेले गरे । उनले विशाल राईको पासमा हेडमार्फत गोल गरेका थिए । मनाङको एउटा प्रहार दोस्रो हाफमा पनि क्रसबारमा लागेर फर्किएको थियो । मनाङका हेमन गुरुङको मात्र तीनवटा प्रहार असफल भएको थियो । मध्य भागमा औसत प्रदर्शन गरेको संकटाको अग्रपंक्ति कमजोर बन्यो । सुरुदेखि नै रक्षात्मक देखिएको संकटाले ८९औं मिनेटमा सान्त्वना गोल फर्कायो । संकटाका लागि सेड्रिक आबाले गोल गरेका थिए । उनले एकल प्रयासमा डीबक्स भित्रबाट गोल गरेका थिए ।
यसैगरी एन्फा मैदानमै भएको अर्को खेलमा च्यासल युथ क्लब र एपीएफ क्लबले १–१ गोलको बराबरी खेल्दै अंक बाँडेका छन् । खेलमा च्यासलले सुरुआती अग्रता लिएको थियो । च्यासलका सन्तबहादुर गुरुङले ३०औं मिनेटमा गोल गरे । उनले सजित थापामगरको पासमा गोल गरेका थिए । ४१औं मिनेटमा पेनाल्टी अवसर गुमाएको एपीएफले ५४औं मिनेटमा बराबरी गोल फर्काएको थियो । एपीएफका लागि श्यामकुमार नेपालीले बराबरी गोल गरे । श्यामकुमारको करिब २५ यार्ड लामो प्रहारले सोझै जाली चुमेको थियो । यसअघि एपीएफका सुदीप शिखाकारको पेनाल्टी प्रहारलाई च्यासलका गोलरक्षक दिनेश थापामगरले बचाएका थिए । बराबरीसँगै १७ अंक बनाएको एपीएफ छैटौं स्थानमा छ । १५ अंक बनाएको च्यासल आठौं स्थानमा छ । लिगमा अब सबै टोलीले दुईदुई खेल खेल्नेछन् ।
सबैको मेहनतले उपाधि
खेलपछि मनाङका प्रशिक्षक सुमन श्रेष्ठले लिगमा अपराजित रहँदै दुई खेलअगाडि नै उपाधि जित्दा खुसी लागेको बताए । ‘यसपटक खेलाडीले धेरै राम्रो खेले । प्रशिक्षकका रूपमा मैले र नाइजेरियाका प्रशिक्षक पुजा टोपेले पनि उत्तिकै मेहनत गरेका छौं । सुरुमा हाम्रो खेल त्यति राम्रो थिएन । विस्तारै सुधार गर्दै गयौं । कुनै खेल हारेनौं । यस उपाधिमा खेलाडी, क्लब व्यवस्थापन, समर्थक सबैको योगदान छ । मनाङ सधैं नेपाली फुटबलको राम्रो टिम हो । उपाधिमा विदेशी खेलाडीको प्रदर्शन पनि थप सहयोगी बन्यो’, सुमनले भने । उनले बाँकी दुई खेल पनि जितेर कीर्तिमान रच्ने दाबी गरे ।
सन् २००४ मा धनकुटा जिल्ला फुटबल संघको प्रशिक्षक रहेका सुमनले विस्तारै पीएलए क्लब, आर्मीको क्षेत्रीय टोली र ब्वाइज युनियन क्लबमा पनि प्रशिक्षकको भूमिका निर्वाह गरेका थिए । एएफसीबाट ‘ए’ लाइसन्स प्राप्त सुमनले लिगमा ठूलो क्लब सम्हालेको यो पहिलोपटक हो ।
यसैगरी संकटाका प्रशिक्षक सल्यान खड्कीले आफ्नै गल्तीले पहिलो गोल खानु नै हारको टर्निङ प्वाइन्ट भएको बताए । ‘पहिलो हाफमा हामीले राम्रो खेलेका थियौं । मौका पाए पनि गोल भएन । मनाङलाई हराएर उपाधि जित्ने योजना सफल भएन । गोल खाएकाले दोस्रो हाफमा गोल गर्न अगाडि बढ्दा काउन्टरमा थप गोल खायौं । मनाङ बलियो टोली हो । हामीले राम्रो टक्कर दियौं’, खड्कीले भने । उनले संकटाले अब दोस्रो स्थानका लागि थप मेहनत गर्ने बताए ।
प्रतिक्रिया दिनुहोस !
