नेपाली युवा लेग स्पिनर सन्दीप लामिछाने अस्ट्रेलियाको चर्चित क्रिकेट लिग बिग बासमा सनसनी मच्चाइरहेका छन् । बिग बासमा सन्दीपले अस्ट्रेलियाको मेलबर्न स्टार्सबाट खेलिरहेका छन् । मेलबर्नले सन्दीपलाई सुरुका तीनै खेलमा खेल्ने अवसर दिएको छ ।
तीनै खेलमा उनले आफूलाई उत्कृष्ट सावित गरिसकेका छन् । तीनै खेलमा पूरै चार ओभर बलिङ गर्न पाएका सन्दीपले ७ विकेट लिइसकेका छन् । सन्दीपले सिड्नी थन्डर्सविरुद्धको पहिलो खेलमै दुई विकेट लिएर तहल्का मच्चाएका थिए । डेब्यु खेलको पहिलो ओभरमै तीन रन खर्चिएर दुई विकेट झारेपछि सन्दीपले विश्व क्रिकेटको ध्यान आफूतर्फ ताने ।
होबार्ट हरिकेन्सविरुद्धको दोस्रो खेलमा फेरि तीन विकेट लिएपछि विश्वभर सन्दीपको चर्चा थप चुलिएको छ । पहिलो खेलमा विकेट लिएपनि महंगो बलिङ गरेका सन्दीपले दोस्रो खेलमा किफायती बलिङ गरे । चार ओभरमा २४ रन मात्रै खर्चिएका उनले ३ विकेट लिएर आफ्नो क्षमतालाई सावित गरे ।
सिड्नी सिक्सर्सविरुद्धको मेलबर्न स्टार्सको तेस्रो खेलमा सन्दीपको प्रदर्शन झन सानदार रह्यो । ४ ओभर बलिङ गरेका उनले २ विकेट लिए भने जम्मा १८ रन खर्चिए । सिड्नी सिक्सर्सलाई १३० रनमा रोकी मेलबर्नले ५ विकेटको जित निकाल्ने क्रममा सन्दीपको किफयती प्रदर्शनले ठूलो योगदान पुर्यायो।
सन्दीपलाई मेलबर्नले कम्तीमा ६० हजार अमेरिकी डलर पारि श्रमिक पाउनेगरी टोलीमा अनुबन्ध गरेको हो । उनी बिग बास लिग खेल्ने एसोसिएट राष्ट्रकै पहिलो खेलाडी हुन् ।
बिग बासपछि सन्दीप उतैबाट बंगलादेश प्रिमियर लिग (बीपीएल) खेल्न बंगलादेश जानेछन् । बीपीएल जनवरी ५ देखि फेब्रुअरी ८ सम्म हुनेछ । बंगलादेशमा सन्दीपले सिल्लेट सिक्सरबाट खेल्नेछन् । सन्दीपलाई इन्डियन प्रिमियर लिग (आईपीएल) मा पनि दिल्ली क्यापिटलले रिटेन गरिसकेको छ । उनले आईपीएलको अघिल्लो सिजन दिल्लीबाट खेल्ने मौका पाएका थिए ।
काठमाडौंमा भर्खर सम्पन्न एभरेस्ट प्रिमियर लिग (ईपीएल) मा सुरुआती दुई खेलमात्र खेलेर सन्दीप अस्ट्रेलिया गएका हुन् । ईपीएलमा ललितपुर प्याट्रियट्सबाट खेलेका सन्दीपले दुई खेलमा पाँच विकेट लिएका थिए ।
पहिलो खेलमा विरानटगरसँग हारे पनि दुई विकेट लिएका सन्दीपले दोस्रो खेलमा चितवन टाइगर्सविरुद्ध तीन विकेट लिँदै टोलीलाई जिताएका थिए । सुरुआती खेलमा सन्दीपको साथ पाएको ललितपुर गत शनिबार मात्र ईपीएल च्याम्पियन नै बन्यो ।
सन्दीपलाई सन् २०१९ को इन्डियन प्रिमियर लिग (आईपीएल) क्रिकेटका लागि दिल्ली डेयरडेभिल्सले फेरि टोलीमा अनुबन्ध गरिसकेको छ । १८ वर्षीय सन्दीपलाई दिल्लीले दोस्रो पटक टोलीमा समावेश गरेको हो । दिल्लीले सन्दीपलाई दोस्रो पटक रेड कार्पेट बिछ्याए पनि उनले पाउने रकम भने खुलाइएको छैन । दिल्लीको टिम व्यवस्थापनले खेलाडीसँग रकम आपसी समझदारीमा तय गर्ने उल्लेख गरेको छ ।
यसअघि सन् २०१८ को आईपीएलको अक्सनमा दिल्लीले सन्दीपलाई २० लाख भारतीय रुपैयाँमा बोली लगाएको थियो । त्यतिबेला सन्दीपको न्यूनतम मूल्य पनि २० लाख रुपैयाँ नै थियो । सन्दीपले दिल्लीको अन्तिम ११ बाट खेल्ने मौका भने अन्तिम तीन खेलमा मात्र पाएका थिए । उनले अन्तिम तीन खेलमा पाँच विकेट लिएर आफ्नो बलियो प्रभाव छाड्न सफल भए ।
क्रिकेटमा एकपछि अर्को छलाङ मारिरहेका उनी सन् २०१८ को विश्व–११ को सूचीमा पनि परेका थिए । सन्दीपले एक महिना अघिमात्र यूएईमा सम्पन्न टी–१० लिग पनि खेले । उनले टी–१० मा केरला किङ्सबाट खेलेका थिए । त्यहाँ उनले ३० हजार अमेरिकी डलर पारिश्रमिक पाए । सन्दीपले यसअघि क्यानडामा ग्लोबल टी ट्वेन्टी क्रिकेट लिग खेल्दा ४० हजार अमेरिकी डलर पाएका थिए ।
सन्दीपले यस वर्ष अफगानिस्तान प्रिमियर लिग (एपीएल) पनि खेले । त्यहाँ उनको पारिश्रमिक १५ हजार अमेरिकी डलर थियो । त्यसअघि उनले क्यारेबियन प्रिमियर लिग खेलेर पाँच हजार अमेरिकी डलर पारि श्रमिक पाएका थिए । विश्व क्रिकेटको ध्यान आफूतर्फ तानिरहेका सन्दीपको मैदानमा जादुमयी बलिङ गर्ने क्रम जारी छ ।
प्रतिक्रिया दिनुहोस !
