वासिङ्टन : हलिउड स्टार एन्जेलिना जोलीले भविष्यमा आफू राजनीतिमा सक्रिय हुनसक्ने बताएकी छन् ।
संयुक्त राष्ट्रसंघीय शरणार्थी निकायका लागि विशेष दूत समेत रहेकी ४३ वर्षीया अभिनेत्री एन्जेलिनाले बिबिसीको एक कार्यक्रममा यस्तो कुरा व्यक्त गरेकी हुन् ।
शुक्रबार बिबिसी रेडियोको एक कार्यक्रममा उनी अतिथि सम्पादकको रुपमा अमेरिकी राजनीति, सामाजिक संजाल, यौन हिंसा र विश्वब्यापाी शरणार्थी संकटबारे बहस गरेकी हुन् ।
प्रस्तोता जस्टिन वेब्बले जब उनलाई राजनीतिमा संलग्न हुन सक्नुहुन्छ कि ? भनेर सोधे, त्यसपछि जोलीले भनिन्, ‘यदी २० वर्षअघि सोधेको भए म हाँस्नसक्थेँ । म सधैँ भन्छु कि, जे काममा मेरो आवस्यकता पर्छ त्यसका लागि काम गर्छु ।’
जोलीले आफू सरकार, सेना लगायतसँगै काम गर्न सक्षम रहेको पनि दावी गरिन् । यस क्रममा जोलीले शरणार्थीबारे अभियान, यौन हिंसा लगायत सामाजिक विषयमा लामो छलफल गरेकी थिइन् । प्रत्यक्ष रुपमा राजनीतिमा अहिले नै सक्रिय हुने नहुनेबारे खुलेर नबोले पनि अभिनेत्री जोलीले आफू त्यसका लागि सक्षम रहेको बताएकी हुन् ।
प्रतिक्रिया दिनुहोस !
