काठमाडौं : चलचित्र ‘चौका दाउ’ को फस्ट लुक्सको रूपमा तीन वटा पोस्टर रिलिज गरिएको छ। एक साताअघि रिलिज गरिएको ट्रेलरले राम्रो चर्चा पाएपछि निर्माण पक्षले आइतबार पोस्टर रिलिज गरिएको हो।
फिल्म यही २७ पुसबाट देशव्यापी रिलिज हुनेछ।
मनोज राजभण्डारी र सौर्यजित बाँस्कोटाले निर्माण गरेको चौका दाउलाई पूर्णेन्दु झाले निर्देशन गरेका हुन्। यो चलचित्रको पोस्टरमा मुख्य कलाकारलाई उनीहरूको चरित्रमा उतारिएको छ। पोस्टरमा सिनेमाका चार जुवाडे रवीन्द्र झा, विल्सनविक्रम राई, तैयव शाह र सन्तोष पन्त जुवा हारेपछि नांगै गाडीमा घर फर्किएको देखाइएको छ। कलाकार सोनिका केसीलाई मदिराको सुराहीसहित प्रस्तुत गरिएको छ।
अर्को पोस्टरमा रवीन्द्र झालाई मधेसी, सन्तोष पन्तलाई शिख, तैयव शाहलाई मुस्लिम र विल्सनविक्रम राईलाई हिमाली भेषमा उतारिएको छ। यही पोस्टरमा यी चारजना अभिनेत्री वर्षा राउतसँग केन्द्रित भएको वर्षाको तस्बिरले जनाउँछ। साथै अभिनेता अज श्र ढुंगाना, निर्मल शर्मा, योगी विकाशानन्द, शिवशंकर रिजाल (जोगिन्दर पानवाला) लाई पनि समेटिएको छ।
चौका दाउका परिकल्पनाकार एवम् वरिष्ठ संगीतकार शम्भुजित बाँस्कोटा हुन्। साढे चार दशकदेखि आफू चलचित्र एवम् संगीत क्षेत्रमा रहेको र यसलाई निरन्तरता दिन चौका दाउ निर्माण गरेको उनले बताएका छन्। चौका दाउ हास्यप्रधान सामाजिक प्रेमकथामा आधारित चलचित्र हो। यो चलचित्रमा कथा, संगीत र गायन पनि बाँस्कोटाकै रहेको छ।
प्रतिक्रिया दिनुहोस !
