गौर : रौतहटको कटहरिया नगरपालिकास्थित जनता माविको प्रांगणमा शनिबार बिहानैदेखि चहलपहल सुरु भयो । शनिबार पनि स्कुलमा मान्छे देखेपछि धेरै दंग परे ।
यस्तैमा कोही माला किन्न दौडिँदै थिए । कोही मन्च नै बनाउन थाले । केही स्थानीय बासिन्दा र नेकपाका अगुवा कार्यकर्तालाई मात्रै थाहा थियो कि, यहाँ नगरपालिकाकै मेयर सियाराम कुश्वाह आउँदै छन् ।
जो गत वैशाखदेखि हत्या अभियोगमा जेल परेका थिए । दिउसो भने अचानक हेलिकप्टरमै उडेर आइपुगेपछि स्थानीय दंग परे । यतिन्जेल उनलाई स्वागत गर्न नगरवासीको भीड भइसकेको थियो ।
शनिबार दिउसो २ बजेतिर उनी हेलिकप्टर चढेरै आफ्नो नगरपालिका कटहरिया आइपुगेका हुन् । सयौं स्थानीयको भीडबीच जनता माविकै प्रांगणमा उनी हेलिकप्टरबाट अवतरण गरेका थिए ।
उनी आउने सुचना पाएपछि नै स्थानीय तथा उनका कार्यकताहरु बिहानैदेखि विद्यालयको चौरमा भेला भइसकेका थिए । यस क्रममा जेलबाट छुटेर आएका कुश्वाहलाई स्थानीयले भव्य स्वागत गरेका हुन् । लामो माला, फूलका गुच्छा सहित, मञ्च नै बनाइएको थियो ।
विद्यालय नै बन्द
कुश्वाहको स्वागत र सम्मानकै लागि भन्दै नगरपालिका भित्रका सामुदायिक स्कुलहरुमा आइतबार सार्वजनिक विदा दिइएको छ । उनलाई स्वागतकै क्रममा यस्तो घोषणा गरिएको थियो । पछि नगरपालिकाले सूचना नै निकालेर विदाको घोषणा गरेको छ।
नगरपालिकाका कर्मचारीहरुले यस्तो जानकारी गराएका थिए । साथै यहाँका सबै सरकारी कार्यालय बन्द गरिने बताइएको छ । कार्यक्रममा मेयर कुश्वाहले बोल्दै आफू प्रतिगामीको षड्यन्त्रबाट छुटेर आउन सफल भएको दावी गरेका थिए ।
विश्व हिन्दु महासंघ पर्साका अध्यक्ष काशिनाथ तिवारीको हत्या अभियोगमा उच्च अदालतले जन्मकैदको सजाय सुनाएपछि कुश्वाह जेल परेका थिए । उनलाई उच्च अदालत जनकपुरको अस्थायी इजलास वीरगञ्जको फैसलापछि सिआइवीको टोलीले गत बैसाखमा काठमाडौंबाट पक्राउ गरी जेल चलान गरेको थियो ।
तर सर्वोच्च अदालतले उनलाई शुक्रबार सफाइ दिएपछि जेलमुक्त भएका हुन् ।
साथमा थिए सांसद
काठमाडौंबाट शनिबार हेलिकप्टरमै गाउँ पुगेका कुश्वाहको साथमा थिए संघीय सांसद तथा नेकपाका प्रदेश २ का अध्यक्ष प्रभु साह । कुश्वाह नेता साहका विश्वासपात्र समेत मानिन्थे । सँगै प्रदेश सभा सदस्य कुन्दन कुश्वाह समेत स्वागतमा रौतहट आएका थिए ।
यस क्रममा नेता प्रभु साहले अभिभावक विहिन भएको नगरपालिकाले न्याय पाएको र आगामी दिनमा कटहरियाले विकासको गति लिने दावी गरेका थिए ।
प्रतिक्रिया दिनुहोस !
