ढाका : बंगलादेशकी प्रधानमन्त्री शेख हसिनाले आइतबार सम्पन्न संसदीय आमनिर्वाचनमा विजयी भएकी छन् । देशका विभिन्न भागमा हिंसात्मक घटनाबीच भएको बंगलादेशको चुनावमा व्यापक धाँधली भएको आरोप लगाउँदै विपक्षी दलले पुनः चुनाव हुनुपर्ने माग गरेको छ । प्रधानमन्त्री हसिनाको अवामी लिग पार्टी र यसको गठबन्धनले ३ सय सदस्यीय संसद्मा २८८ स्थान जितेको छ । मुख्य विपक्षी दल बंगलादेश नेशनलिस्ट पार्टी (बीएनपी) ७ स्थानमा मात्र विजयी भएको निर्वाचन आयोगले जनाएको छ ।
यो विजयसँगै सत्तारुढ अवामी लिगको अध्यक्ष समेत रहेकी हसिना चौथोपटक प्रधानमन्त्री बन्ने भएकी छिन् । आइतबारको चुनावी हिंसाका क्रममा १७ जनाको मृत्यु भएको थियो । विपक्षीहरूले चुनाव निष्पक्ष रूपमा सम्पन्न हुन नसकेको र राज्य संयन्त्रको चरम दुरुपयोग भएको आरोप लगाएका छन् ।
सरकारले विपक्षी दल र यसका कार्यकर्तामाथि चरम दमन गरेको तथा चुनावमा त्रासका वातावरण निर्माण गरेको भन्दै विपक्षी दल बीएनपीले निर्वाचनको नतिजा खारेज गर्न निर्वाचन आयोगसमक्ष आग्रह गरेको छ । ‘हामी स्वतन्त्र सरकारको नेतृत्वमा जतिसक्दो चाँडो नयाँ निर्वाचन गर्न माग गर्दछौं’, विपक्षी दलको गठबन्धनको नेतृत्व गरेका कमल हसनले भने ।
चुनाव हुनु अघिदेखि नै बंगलादेशमा हिंसात्मक झडप भइरहेका थिए । सरकारले सुरक्षा व्यवस्था सुदृढ गर्न ६ लाखभन्दा बढी सुरक्षाकर्मी परिचालन गरे पनि हिंसात्मक घटना भएका थिए ।
मतदानका दिन अवामी लिग र बीएनपीका कार्यकर्ताबीचको झडपमा १३ जनाको मृत्यु भएको थियो भने प्रहरीको गोली लागेर थप तीनजनाको मृत्यु भएको थियो । बीएनपीका प्रवक्ता सइद मोजेम हसन अलालले कुल ३ सय स्थानमध्ये २२१ स्थानमा धाँधली भएको आरोप लगाए ।
प्रधानमन्त्री हसिनाले चुनावको नतिजा सन्तोषजनक रहेको बताउँदै चुनाव स्वतन्त्र र स्वच्छ रूपमा सम्पन्न भएको दाबी गरेकी छिन् ।
पुनः निर्वाचन गराउन अस्वीकार
बंगलादेशमा पुनः निर्वाचन गराउन निर्वाचन आयोगले अस्वीकार गरेको छ । धाँधली भएको भन्दै प्रमुख विपक्षी दलले पुनः निर्वाचन गराउन माग गरे पनि प्रमुख निर्वाचन आयुक्त के. एम. नुरुल हुदाले पुनः निर्वाचन गराउन अस्वीकार गरेका हुन् ।
हुदाले निर्वाचन निष्पक्ष, धाँधलीरहित, स्वच्छ र स्वतन्त्र रूपमा सम्पन्न भएको दाबी गरे । निर्वाचनमा कुल मतदाता मध्ये ८० प्रतिशत मतदाता सहभागी भएको आयोगले बताएको छ । बंगलादेश निर्वाचन आयोगका प्रवक्ता एस.एम. असादुज्जमानले भने, ‘हामीले पुनः निर्वाचन गराउँदैनौं । अर्को निर्वाचन तत्काल गराउनुपर्ने कुनै कारण छैन ।’
प्रतिक्रिया दिनुहोस !
