'२०१९ मा 'समृद्ध नेपाल र सुखी नेपाली' महाअभियान उचाइमा पुग्छ'

काठमाडौं : प्रधानमन्त्री केपी शर्मा ओलीले सन् २०१९ मा समृद्ध नेपाल र सुखी नेपालीको महाअभियान अझ दृढतापूर्वक उचाइमा पुग्ने विश्वास व्यक्त गरेका छन् ।  इस्वी संवतको नयाँ वर्ष २०१९ का अवसरमा मंगलबार शुभकामना सन्देश जारी गर्दै प्रधानमन्त्री ओलीले अर्को नयाँ वर्षको संघारमा पुग्दासम्म जनताको जीवन सुखी र राष्ट्रको अवस्था समृद्ध बनाउने अभियान सार्थक विन्दुमा पुग्ने दाबी गरेका हुन्।

 'निर्वाचनमार्फत प्रकट जनचाहनालाई शीरमा राख्दै मैले पटक-पटक संकल्प गरेको छु, जनताका अपेक्षालाई कुनै पनि हालतमा विफल हुन दिने छैन। प्रधानमन्त्रीले आफ्नो शुभकामना सन्देशमा भनेका छन् 'सरकारको यस अभियानमा सम्पूर्ण पेशा, क्षेत्र, वर्ग र समुदायका दिदीबहिनी दाजुभाइको साथ रहनेछ भन्ने मैले अपेक्षा गरेको छु।'
 

प्रधानमन्त्री ओलीले सन् २०१८ संविधानकार्यान्वय र संक्रमणकाल अन्त्यको वर्ष भन्दै यो राजनीतिक उपलब्धिको वर्ष भनेका छन् । 'जननिर्मित नयाँ संविधानअनुसार निर्वाचनका माध्यमबाट तीनै तहका सरकार गठन भई बितेको वर्षमा राजनीतिक सङ्क्रमणकालको अन्त्य भयो' प्रधानमन्त्री ओलीको सन्देशमा भनिएको छ 'सङ्क्रमणकालीन संशयहरुलाई चिर्दै ‘समृद्ध नेपाल-सुखी नेपाली'को संकल्पसहित हामी विकास र समृद्धिको महाअभियानमा अभिमुख छौं।' २०१८ राजनीतिक संघर्ष र व्यवस्थापनको बहसबाट समाज विकास र समृद्धिको बहसतर्फ केन्द्रित रहन सफल भएको प्रधानमन्त्रीले बताएका छन्।