कुटपिटको विरोधमा कर्मचारी आन्दोलित, तीन दिनदेखि काम ठप्प
पुष १८, २०७५ बुधबार १९:४९:०
बेसीशहर : सहकर्मी कुटिएको विरोध गर्दै लमजुङका सरकारी कार्यालयमा कार्यरत लेखा अधिकृत तथा लेखापालहरुले कामकाज ठप्प पारेका छन् । बुधबार कार्यालयको लेखा सम्बन्धी सबै काम रोकेर लेखापालहरु कोष तथा लेखा नियन्त्रक कार्यालयमा धर्नामा बसेका हुन् ।
सोमबार सुन्दरबजार नगरपालिकाका लेखापाल श्यामबहादुर पराजुलीलाई सत्तारुढ नेकपाको भातृ संगठन युवा संघ सुन्दरबजार नगर कमिटीका उपाध्यक्ष नवीन श्रेष्ठलगायत युवाहरुले कुटपिट गरेका थिए ।
पीडकलाई पक्राउ गरी कारवाहीको माग गर्दै लेखापालहरु आन्दोलनमा उत्रिएका हुन् । उनीहरुले बुधबार नै प्रमुख जिल्ला अधिकारी झंकनाथ ढकाललाई ज्ञापनपत्र बुझाउँदै आक्रमणकारी श्रेष्ठलाई पक्राउ गर्न दवाव दिए ।
पीडितलाई साथ दिँदै कर्मचारीका पेशागत संगठनहरु नेपाल निजामती कर्मचारी संगठन, नेपाल निजामती कर्मचारी युनियन संघ र नेपाल राष्ट्रिय कर्मचारी संगठन निजामतीले पनि संयुक्त विज्ञप्ती प्रकाशन गरी दोषीमाथि कडा कारवाहीको माग गरेका छन् ।
कार्यकक्षमै लेखापाल कुटिएपछि सुन्दरबजार नगरपालिकाको काम तीन दिनदेखि ठप्प छ । कर्मचारीहरु काम नगरी आन्दोलनमा उत्रिएका छन् । बुधबार बसेको नगरकार्यपालिका बैठकले कर्मचारीहरुलाई काममा फर्कन आग्रह गरे पनि कर्मचारीहरुले आक्रमणकारीलाई पक्राउ गर्न तीन दिनको अल्टिमेटम दिएका छन् ।
नगरपालिकाका प्रमुख प्रशासकीय अधिकृत जीवन ज्ञावलीका अनुसार बिहीबारदेखि आन्दोलित कर्मचारीहरु काममा फर्कने छन् । ‘तीन दिनको समय दिएर कर्मचारी साथीहरुले बिहिबारदेखि काममा फर्कने सहमति गर्नुभएको छ’, ज्ञवालीले भने ।
तीन दिनमा आक्रमणकारी पक्राउ नपरे थप कडा आन्दोलन गर्ने उनीहरुको चेतावनी छ । नगरपालिकाको औषधि खरिदको टेण्डर आफ्नो पक्षमा पार्न श्रेष्ठले लेखापालमाथि कार्यकक्षमै कुटपिट गरेको पीडित पक्षको दावी छ ।
सुन्दरबजार नगरपालिकाले औषधि खरिदका लागि गत शुक्रबार टेण्डर आव्हान गरेको थियो । यसअघि मंसिर २० गते गरिएको टेण्डर श्रेष्ठकै समूहले दर्ता भएको फर्म च्यातेपछि रद्ध भएको थियो ।
घाइते लेखापाल पराजुलीको लमजुङ जिल्ला सामुदायिक अस्पताल बेसीशहरमा उपचार भइरहेको छ । घटनामा संलग्न श्रेष्ठ फरार छन् । उनको खोजीकार्य भइरहेको प्रहरी नायव उपरीक्षक यादव ढकालले बताए ।
प्रतिक्रिया दिनुहोस !
