राष्ट्रपतिद्वारा कृषि अनुसन्धान कार्यालय अवलोकन, सर्वसाधारणलाई अवराेध

धरान : कृषि अवलोकनमा रहेकी राष्ट्रपति विद्यादेवी भण्डारीले तरहरास्थित कृषि अनुसन्धान कार्यालय भ्रमण गरेकी छन् । कृषि कार्यालयमा उनले करिब एक घण्टा अवलोकन गरिन् । बिहान साढे १० बजे मात्रै कृषि अनुसन्धान कार्यालयबाट फर्किएकी थिइन् ।

झापामा रहेको कृषि परियोजना र फार्म बुधबार अवलोकन गरेपछि राष्ट्रपति भण्डारीले बिहीबार बिहान इटहरीको कृषि अनुसन्धान कार्यालय अवलोकन गरेकी हुन् । उनले यसअघि कृषि क्षेत्रमा सरकारले सहयोग गर्नेमा आशावादी रहेको भन्दै स्थानीय तह र संघ सरकारबीच सहकार्य हुनुपर्ने बताएकी थिइन् ।

सर्वसाधारणलाई एक घण्टा सडक अवरुद्ध

राष्ट्रपतिको भ्रमणका लागि यहाँ एक घण्टा नै सडक अवरुद्ध पारेर सर्वसाधारणलाई आवतजावतमै रोक लगाइएको थियो ।

सेनाको हेलिकप्टमा इटहरीस्थित पूर्वी पृतनामा अवतरण गरेकी भण्डारीलाई तरहराको कृषि अनुसन्धान कार्यालय लैजान प्रहरीले कोसी लोकमार्गमा पर्ने धरान–इटहरी सडक खण्ड एक घण्टासम्म सर्वसाधारणका लागि रोके लगाएको हो ।

राष्ट्रपती भण्डारीलाई तरहरादेखि सेनाको कार्यालयसम्म आवत जावत गराउन एक घण्टा सडक बन्द गराइएको हो । सुनसरीका प्रहरी प्रमुख एसपी राजन अधिकारीले भने राष्ट्रपतीको सुरक्षाका लागि सर्वसाधारणलाई रोक लगाएर सडक बन्द गर्नु परेको बताए ।