काठमाडौँमा चोरको बिगबिगी, कोठा फोर्दै, रित्याउँदै
काठमाडौं : पछिल्लो समय काठमाडौँमा चोरीका घटना तीब्र भएका छन् । सार्वजनिक सवारीमा हुने पाकेटमारी नियन्त्रणमा प्रहरी जुटेका बेला कोठा फोडेर चोर्नेहरुको बिगबिगी बढेको हो ।
राजधानी उपत्यकामा दैनिक दर्जन भन्दा धेरै चोरीका घटना सार्वजनिक भइरहेका छन् । प्रहरीका अनुसार पछिल्लो पटक काठमाडौँ महानगरपालिका–३१ देउराली क्लब नजिकै डेरा गरी बस्ने झापा बुधबारे नगरपालिका–५ का ३५ वर्षीय एक युवकको कोठाबाट चोरी भएको छ ।
नरेशकिशोर बस्नेतको कोठाबाट बुधबार दिउँसो नगद १० हजार रुपैयाँ र सुनका गहनासमेत गरी करिब ३ लाख ५ हजार रुपैयाँ बराबरको धनमाल चोरी भएको प्रहरीले जनाएको छ ।
यसैगरी काठमाडौं महानगरपालिका–३२ कोटेश्वर महादेवस्थान डेरा गरी बस्ने सिन्धुलीको कमलामाई नगरपालिकाका २५ वर्षीय राजेन्द्र श्रेष्ठको कोठामा कोही नभएको अवस्थामा बुधबारै दिउँसो नगद ६० हजार रुपैयाँ, अमेरिकी डलर २ सय ३० र सुनका गहनासमेत करिब ३ लाख ५७ हजार रुपैयाँ बराबरको धनमाल चोरी भएको छ ।
फरार चोरहरुको खोजी भइरहेको प्रहरीले जनाएको छ । घटनाको पनि प्रहरीले अनुसन्धान गरिरहेको केन्द्रीय प्रहरी समाचार कक्षले जानकारी दिएको छ ।