साढे ६ करोडमा भक्तपुरमा तरकारी बजार
भक्तपुर : काठमाडौंको कालिमाटीपछि दोस्रो ठूलो तथा भक्तपुरमा पहिलो ठूलो तरकारी बजार २५ गतेदेखि सञ्चालनमा आउने भएको छ। युवा श्यामसुन्दर बस्नेतले मध्यपुरथिमि नगरपालिका ३ गठ्ठाघरमा भक्तपुरकै पहिलो व्यवस्थित ठूलो तरकारी बजार सञ्चालनमा ल्याउने भएका हुन्।
गट्ठाघर, चारदोबाटो र बालकोटको संगमस्थानमा तरकारी बजार बनाइएको हो। दुईतर्फी पक्की सडकसमेत विस्तार गरी बस्नेतले १३० वटा सटर र १५० स्टल गरी २८० वटा तरकारी पसल रहने गरि तरकारी बजार निर्माण गरेका हुन्। उनले ७० प्रतिशत सटर बुकिङ भइसकेको बताए। नेकपाका भक्तपुर जिल्ला कमिटी सदस्य बस्नेतले भने, ‘म राजनीतिक मात्रै होइन सामाजिक मान्छे पनि हुँ, कृषकले पसिना चुहाएर गरेको मिहेनत र दुःखको मूल्य नतिर्ने र बिनालगानी तीन सय प्रतिशतसम्म नाफा खाने बिचौलियाको अन्त्य गर्न लागेको हुँ।’ उनका अनुसार, कालिमाटी र बल्खु लगायतका तरकारी बजारभन्दा सस्तोमा उपभोक्तालाई सहजै ताजा तरकारी उपलब्ध गराउने र कृषकको मेहनतअनुसार उचित मूल्य दिएर गाउँगाउँबाट तरकारी संकलन गरिनेछ।
तरकारी बजार र संकलन केन्द्रमा प्रत्यक्ष एक सयभन्दा बढी कलेज पढ्ने विद्यार्थी तथा युवालाई आफूले रोजगारी दिने र प्रत्येक पसलमा समेत गरी करिब आठ सयजनाले प्रत्यक्ष अप्रत्यक्ष रोजगारीको व्यवस्थासमेत गरेको बस्नेतको भनाइ छ।