काठमाडौं : थ्रीस्टार क्लब पल्सर सहिद स्मारक ‘ए’ डिभिजन लिग फुटबलमा तेस्रो भएको छ । सातदोबाटोस्थित एन्फा कम्प्लेक्स मैदानमा आइतबार भएको खेलमा थ्रीस्टारले हिमालयन शेर्पा क्लबलाई २–० गोलले हरायो । लिगको आफ्नो अन्तिम खेलमा थ्रीस्टारका लागि बुद्धराज लिम्बूले खाता खोले । बुद्धराजले २८औं मिनेटमा गोल गरेका थिए । पहिलो हाफमा १–० गोलको अग्रता बनाएको थ्रीस्टारले दोस्रो हाफमा अर्को गोल थपेको थियो ।
थ्रीस्टारका रञ्जन विष्टले ८९औं मिनेटमा गोल गर्दै टोलीलाई महत्वपूर्ण तीन अंक दिलाएका थिए । शेर्पा माथिको जितसँगै थ्रीस्टारले तेस्रो बन्दै लिगको अन्त्य गरेको छ । खेलभर थ्रीस्टारको दबाब झेलेको हिमालयन शेर्पाले गोल गर्न लायक अवसर बनाउन सकेन । जितसँगै थ्रीस्टारले २६ अंक बनायो । १७ अंक बनाएको हिमालयन शेर्पा क्लब सातौं स्थानमा रह्यो ।
यसैगरी हल्चोकस्थित सशस्त्र प्रहरी बलको मैदानमा भएको अर्को खेलमा त्रिभुवन आर्मी क्लबले मच्छिन्द्र क्लबलाई ३–० गोलले हरायो । एकपक्षीय खेलमा आर्मीका लागि भरत खवासले दुई गोल गरे । अर्को गोल टंक बस्नेतले गरेका थिए । टंकले २९औं मिनेटमा गोल गर्दै आर्मीको उत्साह बढाएका थिए । त्यसपछि आर्मीले दोस्रो हाफमा दुई गोल थपेको थियो । आर्मीका कप्तान भरत खवासले ६२औं मिनेटमा गोल गर्दै टोलीको अग्रता दोब्बर बनाए । आर्मीले ७३औं मिनेटमा पेनाल्टीको अवसर पाएको थियो । मच्छिन्द्रका खेलाडीले फल गरेपछि पाएको पेनाल्टीलाई भरतले सही सदुपयोग गरेका थिए ।
यस जितसँगै २५ अंक बनाएको आर्मी लिगमा चौथो भएको छ । सात अंकमा सीमित मच्छिन्द्र १३औं स्थानमा छ । मच्छिन्द्रको आगामी वर्ष हुने लिगमा एक अथवा दुई अंक घट्ने सम्भावना बढेको छ । हाल ६ अंकसहित तालिकाको अन्तिममा रहेको एनआरटीले अन्तिम खेल ब्रिगेड ब्वाइजसँग खेल्दैछ । यदि एनआरटीले ब्रिगेडलाई हराएमा मच्छिन्द्र तालिकाको अन्तिममा पर्नेछ । लिगको उपाधि मनाङले दुई खेलअघि नै जितिसकेको छ । संकटा पनि एक खेलअगावै उपविजेता बनेको छ ।
प्रतिक्रिया दिनुहोस !
