प्रधानसेनापति थापा भारत भ्रमणमा जाँदै
काठमाडौं : नेपाली सेनाका प्रधानसेनापति पूर्णचन्द्र थापा भोलि पुस २७ गते भारतको औपचारिक भ्रमण गर्ने भएका छन् । भारतीय समकक्षी विपिन रावतको औपचारिक निमन्त्रणामा थापाको भ्रमण तय भएको हो ।
उनले भारतीय समकक्षी जनरल विपिन रावत, रक्षामन्त्री, राष्ट्रिय सुरक्षा सल्लाहकार लगायत उच्च अधिकारीहरुसँग भेटवार्ता गर्ने कार्यक्रम तय भएको छ ।
प्रधानसेनापतिमा नियुक्त भएपछि पहिलो पटक थापाको भारत भ्रमण हुन लागेको हो । भ्रमणको क्रममा उनलाई २८ गते भारतका राष्ट्रपति रामनाथ कोविन्दले भारतीय स्थल सेनाको मानार्थ महारथीको दर्जाबाट सम्मान गर्ने छन् । दुबै देशका सेना प्रमुखहरुलाई कदरस्वरुप मानार्थ महारथी दिने ऐतिहासिक प्रचलनको रुपमा तय गरिएको यो औपचारिक कार्यक्रम नै हो ।
साथै थापाले जयपुरस्थित ‘साउथ वेस्टर्न कमान्ड’ र लखनउको ‘सेन्ट्रल कमान्ड’को पनि भ्रमण अवलोकन गर्ने छन् । भ्रमणमा थापाकी श्रीमती साथै सैनिक ईन्टेलिजेन्स महानिर्देशक उपरथी झंकर बहादुर कडायत लगायत ७ जना रहने छन् । माघ २ गते मात्रै सेनापतिको टोली स्वदेश फर्कने विज्ञप्ति जारी गर्दै सैनिक मुख्यालयले जानकारी दिएको छ ।