वीरगन्ज : कप्तान भरत खवासको ह्याट्रिकसँगै नेपाली सेनाको त्रिभुवन आर्मी क्लब वीरगन्जमा जारी दोस्रो टुबोर्ग विशाल मेमोरियल गोल्डकप फुटबल प्रतियोगिताको सेमिफाइनलमा प्रवेश गरेको छ ।
सोमबार नारायणी रंगशालामा भएको खेलमा आर्मी क्लबले बारा सिमराको नव जनजागृती युवा क्लबलाई ३–० गोलले पराजित गर्दैै अन्तिम चारको यात्रा तय गरेको हो ।
आर्मीका लागि तीनवटै गोल कप्तान खवासले गरेका थिए । खेल सुरु भएको ४३ औं मिनेटमा खवासले गोल गरेपछि पहिलो हाफमा आर्मीले १–० को अग्रता लिएको थियो ।
दोस्रो हाफको तेस्रो मिनेटमा मिड फिल्डबाट सिमराका तीनजना खेलाडीलाई छल्दै एक्लै बल लिएर अगाडि बढेका खवासले प्रहार गरेको बलले विपक्षीको गोलपोष्टको जाली चुमेपछि आर्मीले २–० को अग्रता बनायो ।
दोस्रो हाफको ३४ औं मिनेटमा सिमराको डिबक्स एरियाभित्र सिमराका कप्तान सुनील राउतले आर्मीका कप्तान खवासलाई पछाडिबाट ट्याकल गरेर लडाएपछि आर्मीले पेनाल्टी पाएको थियो । उक्त पेनाल्टीमा कप्तान खवासले प्रहार गरेको बल गोलमा परिणत भएपछि आर्मीले सिमरा माथि ३–० को सहज जित हात पारेको हो ।
सिमराका खेलाडीमाथि नेपाली सेनाको टोली एक पक्षीय रुपमा हाबी भएको यस खेलमा ह्याट्रिक गरेका खवास नै म्यान अफ दी म्याच घोषित भए । सोमबारको जितसँगै सेमिफाइनलमा प्रवेश गरेको आर्मीले फाइनल प्रवेशका लागि मङगलबार हुने झापा ११ र भारत सिलीगुरीका रोयल एफसी बीचको विजेतासँग प्रतिस्पर्धा गर्नेछ ।
जारी प्रतियोगितामा आयोजक वीरगन्ज ११ र सशस्त्र प्रहरीको एपिएफ क्लबले यसअघि नै सेमिफाइनलमा स्थान सुरक्षित गरिसकेका छन् । वीरगन्जका पूर्व राष्ट्रिय फुटबल खेलाडी विशालजंग राणको स्मृतिमा विशाल मेमोरियल फाउण्डेशनले आयोजना गरेको प्रतियोगितामा नेपाल र भारतका गरि कुल ७ टीमको सहभागिता छ ।
माघ ५ गतेसम्म चल्ने प्रतियोगिताको विजेता टीमले कप सहित नगद पाँच लाख ५५ हजार पाँच सय ५५ र उपविजेताले दुई लाख ७७ हजार सात सय ७७ रुपैयाँ पुरस्कार प्राप्त गर्ने छ । प्रतियोगिताका सर्वोत्कृष्ट खेलाडीलाई मोटरसाइकल एक थान र प्रत्येक खेलका म्यान अफ दी म्याच घोषित हुने खेलाडीलाई नगद पाँच हजार रुपैयाँ प्रदान गरिने आयोजकले जनाएको छ ।
प्रतिक्रिया दिनुहोस !
