लन्डन : इङ्लिस प्रिमियर लिग फुटबलको सोमबार राति खेलिएको खेलमा सफलता हात पार्दै म्यानचेस्टर सिटीले ‘लिग लिडर’ लिभरपुलसँगको दूरी चार अंकमा झारेको छ । साविक विजेता म्यानचेस्टर सिटीले घरेलु मैदानमा भएको खेलमा वल्भरह्याम्पटनमाथि ३-० गोलको सजिलो जित हात पार्यो ।
खेलको प्रारम्भमै वल्भरह्याम्पटन नौ खेलाडीमा समेटिएपछि म्यानचेस्टर सिटीको जित अझ सहज बनेको थियो । खेलको १९औं मिनेटमै वल्भरह्याम्पटनका विली बोली सिधै रातो कार्ड पाउँदै मैदानबाट बाहिरिएका थिए । बेनार्डो सिल्भासँग फल खेलेका कारण उनले रातो कार्ड पाएका थिए ।
म्यानचेस्टर सिटीको सजिलो जितमा ग्याब्रियल जिससले पहिलो हाफमै दुई गोल गरेका थिए । खेल सुरु भएको १०औं मिनेटमै पहिलो गोल गरेका जिससले ३९औं मिनेटमा पेनाल्टीमार्फत अर्को गोल थपेका थिए । निर्धारित समयको ७८औं मिनेटमा वल्भरह्याम्पटनका कोनर कोडीबाट आत्मघाति गोल भएपछि म्यानचेस्टर सिटीको जित अझ सह बनेको थियो ।
यसैगरी ४८ अंकसहित टोट्टनहाम तेस्रो, ४७ अंकसहित चेल्सी चौथो र ४१ अंकसहित आर्सनल पाँचौं स्थानमा आसिन छन् । ४१ अंक बटुलेको म्यानचेस्टर युनाइटेड भने गोलअन्तरका आधारमा तालिकाको छैटौं स्थानमा छ । वल्भरह्याम्पटन २९ अंकसहित ११औं स्थानमा छ ।
म्यानचेस्टर सिटीले जारी सिजनमा सबै प्रतियोगितालाई मिलाएर ९९ गोल गरेको छ । म्यानचेस्टर सिटीका प्रशिक्षक पेप ग्वार्डिओलाले विपक्षी १० खेलाडीमा सिमित भए पनि आफ्ना खेलाडीले सोचेजस्तो प्रदर्शन गर्न नसकेको बताए । ‘विपक्षीको क्षेत्रमा बल लैजानेभन्दा पनि हामी आपसमा पास खेल्न बढी सक्रिय भयौं । आगामी खेलमा यो गल्ती सुधार्नु आवश्यक छ’, उनले भने ।
वल्भरह्याम्पटनका प्रशिक्षक नुना एसपिरिटो सान्तोले खेलको सुरुमै १० खेलाडीमा सिमित हुनु परेकाले आफूहरु दबाबमा आएको प्रतिक्रिया दिए । अब आगामी शनिबार वल्भरह्याम्पटनले लेस्टर सिटी र आइतबार म्यानचेस्टर सिटीले हडर्सफिल्ड टाउनको सामना गर्नेछन् ।
म्यानचेस्टर सिटीले इत्तिहाद रंगशालामा खेलेको पछिल्ला १५ मध्ये केवल एक खेलमा हार भोगेको छ । बाँकी १४ मध्ये १३ खेलमा जित र एक खेलमा बराबरीमा रोकिएको छ । गत डिसेम्बरमा इत्तिहाद रंगशालामा खेलिएको खेलमा म्यानचेस्टर सिटी क्रिस्टल प्यालेससँग ३-२ गोलले हारेको थियो ।
यसैगरी सोमबार राति खेलिएका खेल वल्भरह्याम्पटनका लागि निराशाजनक रहँदै आएका छन् । सोमबार राति खेलिएका पछिल्ला नौमध्ये आठ खेलमा वल्भरह्याम्पटन पराजित भएको छ।
वल्भरह्याम्पटन यसै सिजन ‘ए’ डिभिजनमा बढुवा भएको क्लब हो । यसरी सोही सिजन प्रिमियर लिगमा बढुवा भएका क्लबविरुद्घ इत्तिहाद रंगशालामा खेलिएको खेलमा म्यानचेस्टर सिटीले आफ्नो अपराजित यात्रा ३५ पुर्याएको छ ।
म्यानचेस्टर सिटी र ग्याब्रियल जिससबीच पनि एउटा गतिलो संयोग जोडिएको छ । जिससले गोल गरेका २० वटा प्रिमियर लिग खेलमध्ये कुनैमा पनि म्यानचेस्टर सिटी पराजित भएको छैन । जिससले गोल गर्दा १९ खेलमा म्यानचेस्टर सिटी विजयी भएको छ भने एक खेल बराबरीमा सकिएको छ ।
म्यानचेस्टर सिटीका लागि इत्तिहाद रंगशालामा आफूले खेलेका पछिल्ला आठ खेलमा जिससले १२ गोल गसिसकेका छन् । सोमबार रातिको खेल डेभिड सिल्भाका लागि म्यानचेस्टर सिटीबाट प्रिमियर लिगमा दुई सय ६७औं खेल थियो । उनले म्यानचेस्टर सिटीका लागि सबैभन्दा बढी खेल खेल्ने जोय हार्टको कीर्तिमानलाई उछिनेका छन् । हार्टले दुई सय ६६ खेल खेलेका थिए ।
यसैगरी सन् २०१२ को अप्रिलपछि प्रिमियर लिगमा सिधै रातो कार्ड पाएर मैदानबाट बाहिरिने विली बोली वल्भरह्याम्पटनका पहिलो खेलाडी बनेका छन् । सन् २०१२ को अप्रिलमा आर्सनलविरुद्घ खेलिएको खेलका क्रममा वल्भरह्याम्पटनका सेबास्टियन बासोङले रातो कार्ड पाएका थिए ।
प्रतिक्रिया दिनुहोस !
