धादिङको खाल्टे र धुवाँकोटमा पनि गोरु जुधाइयो
धादिङ : माघे संक्रान्तिको अवसरमा धादिङका विभिन्न गाउँमा अघिल्ला वर्ष झैँ गोरु जुधाइएको छ ।
यस वर्ष पनि धादिङको खाल्टे र धुवाँकोटमा पनि महोत्सवकै रुपमा गोरु जुधाउने कार्यक्रम गरियो । ४ वर्षयता हरेक माघ १ गते चमेरे गुफा संरक्षण समाजले सांस्कृतिक पर्वको महत्व दिँदै गोरु जुधाउने महोत्सव आयोजना गर्दै आएको हो ।
यस वर्षको गोरु जुधाउने महोत्सव उद्घाटनका लागि कृषिमन्त्री चक्रमाणी खनाल हेलिकप्टर चार्टर गर्दै धादिङको खाल्टे पुगेका थिए । फराकिलो बारीको पाटोमा गाउँका बलिया साँढेहरु जम्मा पारेर बाजी थाप्दै जुधाउने चलनलाई पर्वकै रुपमा मनाइएको हो ।
रसुवाको बेत्रावती नेपाल र तिब्बतबीचको भोट युद्धको सन्धि भएको स्थलमा मान्छेहरु पशु झैँ झगडा गर्न हुन्न भन्ने सन्देश दिनका लागि गोरु जुधाइने प्रचलन सुरु भएको स्थानीय अगुवा बताउँछन् ।
अर्कोतर्फ बझाङी राजा जयपृथ्वीबहादुर सिंह मामाघर आएको बेला मामाले भाञ्जाको स्वागत गर्न गोरु जुधाएको र त्यही बेलादेखि यो परम्परालाई निरन्तरता दिइएको किम्बदन्ति पनि छ । यकिन ऐतिहासिक प्रमाण नभेटिए पनि गोरु जुधाई परम्परा २ सय वर्षभन्दा पुरानो मानिन्छ ।
यही विश्वासका आधारमा रसुवा, नुवाकोट र धादिङमा माघे संक्रान्तिको दिन गोरु जुधाउने परम्परा चल्दैआएको हो । खाल्टेमा आयोजना गरिएको गोरु जुधाउने महोत्सवमा १० हल गोरु जुधाइएको थियो । साथमा हास्य कलाकारहरुले आफ्नो प्रस्तुतीको माध्यमबाट मनोरन्जन दिएका थिए ।
धुवाँकोटमा भने १२ हल गोरु जुधाइयो । पहिले छिमेकीहरुले संक्रान्तिको दिन भोज भतेर गरेर रमाइलो मनाउन गोरु जुधाइने गरेको भए पनि महोत्सव नै गरेर गोरु जुधाउन थालिएपछि यसको महत्व बढेको ९२ वर्षीय स्थानीय विष्णु प्रसाद ढुङ्गाना बताउँछन् । गोरु जुधाइमा बिजेता गोरुको मालिकले पुरस्कार समेत पाउँछन् ।