बेंसीशहर : नेपाली कांग्रेसका सभापति शेरबहादुर देउवाले वर्तमान सरकारले आचारण नसुधारे आन्दोलनमा उत्रने चेतावनी दिएका छन् । सोमबार सदरमुकाम बेंसीशहरमा प्रेस युनियन लमजुङको छैटौँ जिल्ला अधिवेशन उद्घाटन गर्दै सभापति देउवाले वर्तमान सरकार अधिनायकवादी शैलीमा अघि बढेको आरोप लगाए ।
वर्तमान सरकारले नागरिकका अभिव्यक्ति स्वतन्त्रतामा हस्तक्षेप गरेको उनको आरोप थियो । ‘सरकारले नागरिकलाई शान्ति सुरक्षा दिन सकेन । नागरिकलाई बोल्न र हिँड्न दिइएको छैन’, देउवाले भन, ‘मान्छे डराइडराई हिँड्नु परेको छ । सरकारको यस्तो गतिविधिविरुद्ध आन्दोलन गर्नुपर्ने बाध्यता छ ।’
ओली सरकार बनेपछि हत्या, हिंसा र बलात्कारका घटना एकपछि अर्को गरेर भइरहेको देउवाले आरोप लगाए । ‘ओली सरकार आएपछि कञ्चनपुरमा निर्मला पन्तको हत्या भयो । हत्यारालाई सरकारले नै लुकाइरहेको छ’, उनले अगाडि भने, ‘हत्या हिंसा बलत्कारका घटना बढिरहेका छन् । सरकारले शान्तिसुरक्षा दिन सकिरहेको छैन ।’
नागरिकलाई शान्ति सुरक्षा दिने सरकारको कर्तव्य भए पनि शान्ति र डर त्रासबिना हिँड्न पाउने र बाँच्न पाउने अधिकारमाथि सरकारले हस्तक्षेप गरेको देउवाले बताए । उनले प्रत्यक्ष अप्रत्यक्षरूपले अभिव्यक्ति स्वतन्त्रतामाथि आक्रमण गर्न खोजिएको बताए । फ्री–प्रेस र प्रजातन्त्र पर्यायवाची एक अर्काका परिपूरक भएको बताउँदै उनले प्रजातन्त्र विरोधी काम गर्ने छुट कसैलाई नहुने बताए ।
कांग्रेस केन्द्रीय सदस्य तथा पूर्व अर्थमन्त्री रामशरण महतले हरेक क्षेत्रमा कम्युनिष्ट हाबी भएको आरोप लगाए । आफू काम नगर्ने अनि अरूले गरेका कामको जस आफैँ लिने कम्युनिस्टका कारण विकास हुन नसकेको उनको आरोप थियो ।
अर्का केन्द्रीय सदस्य दिलबहादुर घर्तीले कम्युनिष्ट सरकार अधिनायकवादतर्फ उन्मुख भएको आरोप लगाए । प्रेस युनियनका अध्यक्ष बद्री सिग्देलले कांग्रेसमा बढ्दो किचलोले कम्युनिष्टलाई फाइदा पुगेको बताए ।
‘हामी युनियन एकढिक्का छौँ । कांग्रेस किन एक ढिक्का भएन ? यसमा सभापतिज्यू गम्भीर हुनुपर्छ । अरू सबै नेता गम्भीर हुनुपर्छ’, उनले भने ।
प्रतिक्रिया दिनुहोस !
