काठमाडौं : नेपालबाट दक्षिण एसिया चार्टर्ड एकाउन्टेन्टस् महासंघ (साफा)को प्रतिस्पर्धामा पठाइएका विभिन्न कम्पनीका वित्तिय प्रतिवेदनमध्ये दुई प्रतिवेदन पुरस्कृत भएका छन् ।
नेपालमा लेखा व्यवसायीहरुको नियामक संस्था– नेपाल चार्डर्ड एकाउन्टेन्ट संस्था (आइक्यान)को मूल्यांकनमा छनौटमा परी क्षेत्रीय प्रतिस्पर्धामा भाग लिएका आर्थिक वर्ष २०७३÷७४ विभिन्न विधाका वित्तिय प्रतिवेदनहरुमध्ये सेवा क्षेत्रतर्फ नेपालको ओरियन्टल होटल्स प्रा.लि. (र्याडिसन होटल, काठमाडौं) पुरस्कृत भएको छ । त्यस्तै, बैंकिङ्ग विधा अन्तर्गत नेपालबाट सिटीजन्स बैंक लिमिटेडले मेरिट अवार्ड प्राप्त गरेको छ ।
आइक्यानका अनुसार, नेपालको इतिहासमै पहिलोपल्ट साफास्तरीय प्रतिस्पर्धामा नेपालबाट पठाइएको वित्तीय प्रतिवेदन विजयी भएको हो । क्षेत्रीय प्रतिस्पर्धामा सेवाअन्तर्गत र्याडिसन होटल, काठमाडौंसँगै श्रीलंकाको द नुवारा एलिया होटल्सले संयुक्त रूपमा विजयी घोषित भएको हो । र्याडिसन होटलले प्राप्त गरेको पुरस्कार साफास्तरीय प्रतिस्पर्धामा सबैभन्दा ठूलो पुरस्कार भएको आइक्यानका अध्यक्ष जगन्नाथ उपाध्याय निरौलाले जानकारी दिए ।
भारतको पुणेमा मंगलबार सम्पन्न उत्कृष्ट वित्तीय प्रतिवेदन पुरस्कार वितरण समारोहमा ओरिएन्टल होटेल्स लिमिटेड, काठमाडौंका महाप्रबन्धक सुबरता बेनर्जी र सिटीजन्स बैंकका कामु प्रमुख कार्यकारीअधिकृत गणेशराज पोखरेलले विजयी संस्थाहरूको तर्फबाट उत्कृष्ट वित्तीय प्रतिवेदन पुरस्कार ग्रहण गरेका थिए ।
आइक्यानले हरेक वर्ष विभिन्न निकायबाट प्राप्त विभिन्न विधाका वित्तीय प्रतिवेदनको मूल्यांकन गरी राष्ट्रिय रूपमा उत्कृष्ट ठहराएका प्रतिवेदनलाई साफामा प्रतिस्पर्धाका लागि पठाउँदै आएको छ । साफालाई सार्कले क्षेत्रीय लेखा व्यवसायीहरूको सर्वोच्च संस्थाको मान्यता प्रदान गरेको छ ।
प्रतिक्रिया दिनुहोस !
