बाजुरा : सोमबारदेखि हिमपात भएपछि बाजुराको पूर्वी उत्तरी क्षेत्रको कोल्टी एयरपोर्ट बन्द भएको छ । हिमपातका कारण नियमित सञ्चालन हुँदै आएको हवाई सेवा तीन दिनयता ठप्प भएको छ।
मौसम बिग्रिएसँगै कोल्टी र आसपासका उच्च हिमाली क्षेत्रमा हिमपात भएपछि हवाई सेवा अवरुद्ध भएको बाजुरा नागरिक उड्ययन शाखा कार्यालय कोल्टीले जानकारी दिएको छ । कोल्टी क्षेत्रमा मौसममा खराबी हुँदा नेपालगन्ज र सुर्खेतबाट दैनिक कोल्टी आउने र जाने यात्रु अलपत्र परेका छन् ।
कोल्टी एयरपोर्टबाट बाजुराका बूढीनन्दा नगरपालिका, जगनाथ, स्वामीकार्तिक खापर र हिमाली गाउँपालिका त्यसैगरी हुम्ला, मुगु, कालिकोटका स्थानीयले सेवा लिँदै आएका छन् ।
त्यस्तै हिमपातकै कारण बाजुराको ‘क’ र ‘ख’ क्षेत्रको सम्बन्ध टुटेको छ । बडिमालिका र बूढीनन्दा नगरपाकिालको सिमाना पोरखे लेकमा मंगलबारदेखि हिउँ परेपछि सम्बन्ध टुटेको हो ।
चार पाँच फिट हिउँ जमेकाले हिँडडुलमा समस्या भएको बडिमालिका नगरपालिका–७ का वडाअध्यक्ष धर्मराज पाध्यायले बताए । जिल्ला सदरमुकाम मार्तडीबाट ग्रामीण क्षेत्रमा चल्दै आएको जिप पनि तीन दिनदेखि अबरुद्ध छ ।
हिमपातका कारण ग्रामीण भेगका कच्ची सडकहरू हिलाम्मे भएकाले सडकमा यात्रा गर्न र गराउन समस्या भएको जय मालिका यातायात प्रालिका काउन्टर इन्चार्ज चक्र बडुवाले बताए ।
सदरमुकाम मार्तडीबाट जिल्लाको गौमुल र कोल्टीसम्मको सडकमा हिमपात बढी भएकोले जिप सुचारू हुन नसकेको बाजुरा प्रहरी प्रमुख उद्ववसिंह भाटले बताएका छन् ।
प्रतिक्रिया दिनुहोस !
