बेनी : म्याग्दीका सवारी चालकको बिहीबार सडकमै स्वास्थ्य परीक्षण गरिएको हो।उनीहरुको रक्तचाप (प्रेसर) र आँखाको परीक्षण गरिएको चिकित्सकले जनाएका छन्। जिल्ला ट्राफिक प्रहरी कार्यालयको आयोजनामा दुर्घटना न्युनीकरणमा सघाउ पुर्याउने उद्देश्यले बेनी अस्पताल र आँखा उपचार केन्द्रको प्राविधिक सहयोगमा चालकको स्वास्थ्य परीक्षण गरिएको हो।
स्वास्थ्यप्रति सचेत बनाउने उद्देश्यले स्वास्थ्य परीक्षण गरिएको ट्राफिक प्रहरी कार्यालयका प्रहरी सहायक निरीक्षक मित्रलाल ढकालले बताए। बेनी-गलेश्वर सडकको जलेश्वरमा सञ्चालन गरिएको स्वास्थ्य परीक्षणका क्रममा ७५ जना चालकको आँखा र प्रेसरको परीक्षण गरिएको कार्यालयका बैकुण्ठ पौडेलले बताए। ७ जनामा रक्तचाप र २ जनामा न्यून दृष्टिको समस्या भएको चिकित्सक टोलीले जानकारी दियो।
समस्या देखिएकालाई औषधि खान र अन्यलाई नियमित व्यायाम गर्न चिकित्सकले सुझाव दिएका छन्। दैनिक खानपानमा पनि ध्यान दिन चालकलाई स्वास्थ्यकर्मीको सुझाव छ।
प्रतिक्रिया दिनुहोस !
