पेरिस : फ्रान्सेली फुटबल क्लब मोनाकोले प्रशिक्षक थिएरी हेनरीलाई पदबाट बर्खास्त गरेको छ । हेनरी आफ्नो समयका चर्चित खेलाडी हुन् । उनी फ्रान्सलाई विश्वकप फुटबलको उपाधि जिताउने टोलीका महत्वपूर्ण सदस्य पनि हुन् ।
पहिलो श्रेणीको क्लब मोनाकोले प्रशिक्षक बनाएको तीन महिनापछि नै ४१ वर्षीय हेनरीलाई पदबाट बर्खास्त गरेको हो । उनको प्रशिक्षकत्वमा मोनाकोले २० वटा खेलमात्र खेल्यो । मोनाकोले हेनरीलाई पदबाट बर्खास्त गरिएको बताए पनि हेनरीले भने आफैले पद छाडेको दाबी गरेका छन् ।
हेनरी मोनाकोकै पूर्वखेलाडी पनि हुन् । उनले सन् १९९४ देखि सन् १९९९ सम्म मोनाकोबाट ब्यवसायिक फुटबल खेलेका थिए । आफ्नो सक्रिय खेल जीवनमा हेनरीले मोनाकोका अतिरिक्त इटालियन क्लब युभेन्ट्स, इङ्लिस क्लब आर्सनल र स्पेनिस क्लब बार्सिलोनाबाट पनि ब्यवसायिक फुटबल खेलेका थिए ।
जारी सिजनमा अत्यन्तै निराशाजनक प्रदर्शन गर्दै आएको मोनाको फ्रेन्च लिग तालिकाको रेलिगेसन क्षेत्रमा छ । फ्रेन्च लिगमा हालसम्म २१ खेल खेलेको मोनाको १५ अंकसहित तालिकाको १९औं स्थानमा छ । मोनाकोभन्दा पछाडि गुइनग्याम्पमात्र छ ।
हेनरीले प्रशिक्षणको जिम्मेबारी सम्हालेपछि मोनाकोले विभिन्न प्रतियोगितामा गरेर पाँच खेलमा सफलता हात पारेको छ । हेनरी पदमुक्त भएपछि अब शुक्रबार मोनाकोको प्रशिक्षणको जिम्मेबारी अस्थायी रुपमा उनका सहायक फ्रान्क पासीले सम्हाल्ने छन् ।
हेनरी गत अक्टोबरमा मोनाको प्रशिक्षकमा नियुक्त भएका थिए । गत शनिबार भएको स्ट्रासबर्गविरुद्घको खेलमा हेनरीले आक्रोशित हुँदै विपक्षी टोलीका डिफेन्डर केन्नी लालामाथि अपशब्द प्रयोग गरेका थिए । सोही कारणले उनी बिबादमा पनि तानिएका थिए । त्यसपछि उनले उक्त कार्यका लागि लालासँग माफी पनि मागेका थिए ।
प्रतिक्रिया दिनुहोस !
