चन्द्रपुर : रौतहटको चन्द्रपुर नगरपालिका–६ स्थित शेरबहादुर दर्लामी स्मृति खेलमैदानमा निर्माण भइरहेको महिला फुटबल एकेडेमी निर्माण कार्य रोकिएको छ । वन विभागको आदेश भन्दै डिभिजन वन कार्यालय रौतहटले निर्माणको काम मंगलबारदेखि रोकेको हो । वनक्षेत्रको जमिनमा एकेडेमी निर्माण गर्न लागेको भन्दै उजुरी परेपछि काम रोकिएको डिभिजन वन कार्यालयको दाबी छ ।
न्यु ड्र्यागन र नया“ युग निर्माण कम्पनीले संयुक्त रूपमा तीन करोड २५ लाख ३८ हजार तीन सय चार रुपैयाँको लागतमा उक्त एकेडेमी निर्माणको ठेक्का लिएर काम अघि बढाएको थियो । एकेडेमी भवनको फाउन्डेसनको काम धमाधम भइरहेको थियो । फलामे पिलरहरू ठड्याउन तयार पारिएको छ । निर्माण स्थलमा भवन निर्माणका सामग्रीहरू ल्याइसकिएको छ । एक साताअघि देखि भवन निर्माण सुरु भएको थियो ।
चन्द्रपुरमा सर्वपक्षीय भेलाले एकेडेमी बनाउने निर्णय गर्दै वन कार्यालयमा कागजात बुझाएको थियो । वन कार्यालयले पनि आफ्नो माथिल्लो निकायमा आवश्यक कागजात तयार गरेर पठाएको थियो । हातेमालो सामुदायिक वन समितिले एकेडेमी निर्माण गर्न २५ वर्षसम्मका लागि सहमति दिँदै सम्झौतासमेत गरेको थियो । चन्द्रपुर नगरपालिकाको कार्यालयले पनि एकेडेमी निर्माणका लागि वन कार्यालयलाई सिफारिस गरिसकेको छ । नगरपालिकाले एकेडेमीका लागि २५ लाख रुपैयाँसमेत विनियोजना गरेको जनाएको छ ।
अहिले महिला फुटबल एकेडेमी बन्न लागेको स्थान करिब दुई दशक अघिदेखि नै खेलमैदानको रूपमा प्रयोग हुँदै आएको छ । सो क्षेत्रमा रूखहरू पनि पर्दैनन् । विश्व फुटबल महासंघ (फिफा) ले नेपालमै पहिलो महिला फुटबल एकेडेमी निर्माण गर्न लागेको हो । महिला फुटबल खेलाडी उत्पादनका दृष्टिकोणले रौतहट देशकै महŒवपूर्ण जिल्ला मानिन्छ । रौतहटका डिभिजन वन अधिकृत विनोद सिंहले कागजी प्रक्रिया नपुगेकाले निर्माण कार्य रोकेको जानकारी दिए ।
संघका अध्यक्ष भगवान दर्लामी भने एकेडेमी निर्माणका लागि रौतहट जिल्ला फुटबल संघले सबै प्रक्रिया पु¥याएर वन विभागमा कागजपत्र बुझाइसकेको बताउँछन् । ‘वन क्षेत्रको खाली रहेको थोरै जमिनमा कानुनी प्रक्रिया पु¥याएर नै एकेडेमी निर्माण गर्न लागिएको हो । रूख बिरुवामा कुनै पनि नोक्सानी हुँदैन । खाली जमिनमा वृक्षरोपणसमेत गर्ने योजना छ’, दर्लामी भन्छन् ।
महिला फुटबल खेलाडीलाई सुविधा सम्पन्न आवासगृह, सुरक्षाका लागि मैदान वरिपरि तारजाली, स्तरीय खेलमैदानसहितको एकेडेमी निर्माणका लागि फिफाले स्वीकृत दिएको थियो । करिब दुई कठ्ठा क्षेत्रफलमा एकेडेमी निर्माण हुन लागेको हो । निर्माणपछि पहिलो चरणमा देशभरबाट छनोट भएका १२ वर्षभन्दा माथिका ४४ जना किशोरीलाई समावेश गरेर प्रशिक्षण दिइनेछ ।
जिल्ला फुटबल संघका सदस्य सञ्जय कार्की एकेडेमी निर्माण भए वन क्षेत्रको जमिनसमेत अतिक्रमण हुनबाट जोगिने बताउँछन् । उनी देशको नमुनाको रूपमा रहेको योजना रोकिनु दुर्भाग्य भएको धारणा व्यक्त गर्छन् । एकेडेमीको निर्माण कार्य एक वर्षभित्र सम्पन्न गर्ने लक्ष्य रहेको छ । विगत १५ वर्षदेखि रौतहटको चन्द्रनिगाहपुरमा १२ वर्षभन्दा माथिको उमेरका ७० जना किशोरीले नियमित रूपमा फुटबलको प्रशिक्षण लिइरहेका छन् ।
प्रतिक्रिया दिनुहोस !
