जनकपुरधाम : धनुषाका विभिन्न स्थानबाट नियन्त्रणमा लिइएका सवारी साधनलाई प्रहरीले प्रर्दशनीमा राखेको छ। जिल्ला ट्राफिक कार्यालय जनकपुरले ६ महिनाको अवधिमा नियन्त्रणमा लिएका सवारीसाधन एक सातासम्म प्रर्दशनीमा राखिने प्रहरीले बताएको छ।
कार्यालयले शुक्रबार पत्रकार सम्मेलन गरी कागजात दुरुस्त नभएका, चेसिस नम्बर नभएका सवारी साधन सार्वजनिक गरेको हो। कागजात दुरुस्त नरहेका भारतीय नम्बरको चारपांग्रै सवारी साधन ३ वटा, विभिन्न ब्राण्डका मोटरसाइकल १४ थान र एउटा टेम्पो सार्वजनिक गरिएको प्रहरीले जनाएको छ।
उक्त सवारी साधन चोरी भएका, हराएका वा कागजात दुरुस्त नभई नियन्त्रणमा लिइएको हुँदा सम्बन्धित सवारी धनीले आवश्यक कागजातका साथ प्रक्रिया पुर्याइ आफ्नो सवारी साधन लिएर जानसक्ने प्रहरी निरीक्षक दिपक कुमार साहले बताए ।
चालु आर्थिक वर्षमा कार्यालयले आवश्यक कारवाहीका लागि भारतीय नम्बरको १ ट्रक, २ स्कारपियो, २ कार र १ ग्रेडरलाई जलेश्वर भन्सार कार्यालय पठाइसकेको छ। गत आर्थिक वर्ष कार्यालयबाट २२ हजार १ सय ८२ वटा सवारी साधनलाई कारवाहीबाट १ करोड २ लाख ८० हजार २ सय राजश्व संकलन गरिएको हो। चालु आर्थिक वर्षमा १२ हजार ४ सय १८ सवारी साधनमा कारवाही गरी ७७ लाख ६० हजार ५ सय राजश्व संकलन गरिएको हो।
प्रतिक्रिया दिनुहोस !
