काठमाडौं : संयुक्त अरब इमिरेट्स (यूएई) विरुद्धको दोस्रो एकदिवसीय खेलमा नेपाल एक सय ४५ रनको भारी अन्तरले विजयी भएको छ । यो जितसँगै नेपालले शृंखलामा सानदार ‘कमब्याक’ पनि गरेको छ । दोस्रो एकदिवसीय खेल जितेसँगै तीन खेलको शृंखला १–१ को अवस्थामा पुगेको छ ।
कमजोर ब्याटिङ प्रदर्शन गरेको नेपाल शुक्रबार पहिलो एकदिवसीय खेलमा तीन विकेटले पराजित भएको थियो । त्यही कमजोर ब्याटिङमा सुधार ल्याउँदा नेपाल दोस्रो खेलमा भने ठूलो अन्तरको जित हात पार्न सफल भएको हो । यो जितसँगै नेपालले केही महŒवपूर्ण कीर्तिमानसमेत आत्मसात् गरेको छ ।
हालसम्म पाँचवटा मात्रै अन्तर्राष्ट्रिय एकदिवसीय खेल खेलेको नेपालका लागि यो मात्रै दोस्रो जित हो । त्यसमध्ये यो अहिलेसम्म्को ठूलो अन्तरको जित पनि हो । नेदरल्यान्ड्सविरुद्ध इतिहासकै पहिलो शृंखलाअन्तर्गत गत अगस्टमा भएको दुईमध्ये दोस्रो एकदिवसीय खेल नेपालले एक रनले जितेको थियो ।
दुबईस्थित अन्तर्राष्ट्रिय क्रिकेट काउन्सिल (आईसीसी) एकेडेमीको मैदानमा टस जिती पहिले ब्याटिङ गरेको नेपालले निर्धारित ५० ओभरमा नौ विकेट गुमाउँदै दुई सय ४२ रनको योगफल खडा गरेको थियो । यो योगफल नेपालले एकदिवसीय अन्तर्राष्ट्रिय खेलमा जोडेको अहिलेसम्मकै सर्वाधिक योगफलसमेत हो ।
जवाफमा आएको घरेलु टोली यूएईलाई १९.३ ओभरमा ९७ रनमै समेट्दै नेपालले जित निश्चित गरेको हो । नेपालको जितमा युवा खेलाडी रोहित पौडेलको कीर्तिमानी अर्धशतकसँगै सोमपाल कामी र सन्दीप लामिछानेको उत्कृष्ट बलिङ प्रदर्शन रह्यो ।
नेपालका लागि सातौं क्रममा ब्याटिङका लागि छिरेका रोहितले ५८ बलमा ५५ रन जोडे, जसमा सात चौका सामेल थियो । यससँगै एकदिवसीय क्रिकेटमा उनी सबैभन्दा कम उमेरमा अर्धशतक प्रहार गर्ने खेलाडी बनेका छन् । उनले आरिफ सेख (२९) सँग मिलेर छैटांै विकेटका लागि सर्वाधिक ८२ रनको साझेदारी गर्दै नेपालको पालि उकास्ने काम गरेका थिए । उनको यो साझेदारी पनि अन्तर्राष्ट्रिय एकदिवसीय क्रिकेटमा नेपालले बनाएको अहिलेसम्मकै ठूलो साझेदारी बन्न पुग्यो ।
त्यसअघि प्रारम्भिक ब्याट्सम्यानद्वय ज्ञानेन्द्र मल्ल (४४) र विनोद भण्डारी (२१) ले पहिलो विकेटका लागि ६१ रनको साझेदारी गर्दै नेपाललाई गतिलो सुरुआत दिलाएका थिए । त्यसमा ज्ञानेन्द्रले चार तथा विनोदले दुई चौका प्रहार गरेका थिए । त्यसबाहेक कप्तान पारस खड्काले २१ रन जोड्दा करण केसीले ११ बलमा दुई छक्का र एक चौकाको मद्दतले १८ रन जोडे । सन्दीप लामिछाने १० रनमा अविजित रहे ।
बलिङतर्फ सोमपाल र सन्दीपले आफ्नो खेलजीवनकै सशक्त प्रदर्शन गर्दै यूएईलाई लक्ष्यसम्म पुग्नुअघि नै रोक्न सफल भए । सोमपाल एक्लैले पाँच विकेट लिए । त्यससँगै उनी एकै खेलमा सर्वाधिक विकेट लिने नेपाली खेलाडी बनेका छन् । ६.३ ओभर बलिङ गरेका सोमपालले एक मेडनसहित ३३ रन खर्चिए । उनीपछि सन्दीपले चार ओभरमा एक मेडनसहित मात्रै २४ रन खर्चिएर चार विकेट लिए । सन्दीपले एकै ओभरमा यूएईको तीन खेलाडीलाई आउट गरेका थिए ।
नेपाली खेलाडीको कसिलो बलिङसामु यूएईका मोहमद उस्मानले २६ रन जोड्नेबाहेक अन्य कुनै पनि खेलाडीले गतिलो प्रदर्शन गर्न सकेनन् । अस्फाक अहमदले २० रन जोड्दा कप्तान मोहमद नाभिद १९ तथा सीपी रिजवान १६ मै आउट हुन पुगे । बाँकी खेलाडीले दोहोरो अंकमा रन जोड्न सकेनन् । बलिङतर्फ अमिर हायातले तीन विकेट लिएका थिए । अब नेपालले यूएईविरुद्धको एकदिवसीय शृंखलाअन्तर्गत सोमबार तेस्रो तथा निर्णायक खेल खेल्ने छ ।
प्रतिक्रिया दिनुहोस !
