काठमाडौं : राज्य व्यवस्था समितिमा अंगीकृत नागरिकता छानबिनबारे छलफल चलिरहेको छ । समितिमा आइतबार यो विषयले प्रवेश पाइरहँदा संघीय रजपाका सांसद प्रमोद साहले सामाजिक सञ्जाल फेसबुकमा ‘लाइभ’ गरेका थिए । सत्तासीन नेकपाका सांसद झपट रावलको आपत्तिपछि समिति सभापति शशि श्रेष्ठले सांसद यादवलाई लाइभ गर्न रोक लगाइन् ।
समितिमा नागरिकता ऐन संशोधन विधेयकमाथि दफावार छलफल चलिरहेको छ । ०६२÷०६३ पछि राजनीतिक सहमतिमा आधारमा बाँडिएका अंगीकृत नागरिकता छानबिन गर्न आयोग बनाउने विषय विधेयकमा राख्ने कि नराख्ने भन्नेमा छलफल जारी छ । सत्तासीन नेकपाका सांसद रावल, नेमकिपाका प्रेम सुवाललगायत सांसदले अंगीकृत नागरिकतामाथि छानबिन गर्न आयोगको व्यवस्था विधेयकमै राख्नुपर्ने माग गर्दै आएका छन् ।
राजपाका सांसद साहलेले भने आफ्ना कुरा राख्ने क्रममा फेसबुकमा लाइभ गरे । सँगै बसेका नेकपा सांसद रावलले आपत्ति जनाउँदै समिति सभापति श्रेष्ठको ध्यानाकर्षण गराए । सभापति श्रेष्ठले फेसबुक लाइभ बन्द गर्द सांसद यादवलाई निर्देशन दिइन् । साहले भने पत्रकारले लाइभ गर्दा हुने, आफूले किन नपाउने भनी प्रश्न गरेका थिए । तर सभापति श्रेष्ठले पत्रकारको काम सांसदलाई नगर्न निर्देशन दिइन्।
नागरिकता विधेयकमा अंगीकृतका सन्तानलाई वंशजको नागरिकता दिने कि नदिने भन्नेमा दलहरूबीच मुख्य विवाद छ । समितिले सरोकारवालासँग छलफल गरेर दफवार छलफल प्रारम्भ गरेको समिति सभापति श्रेष्ठले जानकारी दिइन् ।
*भुलसुधार : यसअघि यस समाचारमा सांसद प्रमोद साह हुनुपर्नेमा सांसद प्रदीप यावदको नाम पर्न गएकोमा क्षमायाचना सहित सच्चाइएको छ । : सम्पादक
प्रतिक्रिया दिनुहोस !
