करेन्ट लागेर ज्यान गुमाउनेका परिवारलाई जनही पाँच लाख
काठमाडौँः धनुषामा केही दिनअघि करेन्ट लागेर ज्यान गुमाएका व्यक्तिका परिवारलाई सरकारले जनही पाँच लाख रुपैयाँ राहत दिने भएको छ । ऊर्जा, जलस्रोत तथा सिँचाइ मन्त्रालयले धनुषाको सबैलामा करेन्ट लागेर ज्यान गुमाएका परिवारलाई जनही पाँच लाख दिने निर्णय गरेको छ ।
ऊर्जा, जलस्रोत तथा सिँचाइमन्त्री वर्षमान पुन ‘अनन्त’ ले घटनामा मृत्यु भएका परिवारलाई क्षतिपूर्ति र सबै घाइतेको उपचार खर्चसमेत सरकारले व्यहोर्ने जानकारी दिए ।
धनुषाको सबैला नगरपालिका–४ कोठिया बल्टियामा विवाहमा गएर फर्किएको जन्ती बसमा ११ हजार भोल्टको करेन्ट प्रवाह भई आगलागी हुँदा ६ जनाको मृत्यु भएको थियो ।
मन्त्री पुनले यस घटनामा दुःख व्यक्त गर्दै पीडित परिवारलाई राहत र घाइतेको सम्पूर्ण उपचार सरकारले व्यहोर्ने बताए । गत शुक्रवार करेन्ट लागेर २१ जना घाइते भएका थिए । १९ जना घाइते अस्पतालबाट डिस्चार्ज भइ घरमै उपचार गरिरहेका छन् भने दुईजना हाल अस्पतालमै उपचाररत छन् ।