हिमपातपछि ओढारमा हराएकाको खोजी तिब्र, ३० जनाको टोली खटियो
माघ १४, २०७५ सोमबार १८:५२:०
धादिङ : बाक्लो हिमपात भइरहँदा सुरक्षित हुन ओढारभित्र बसेका बेला पहिरो खसेपछि बेपत्ता भएका दुईजना किसानको खोजी कार्य तिब्र पारिएको छ । तर उनीहरुको अवस्थाबारे केही जानकारी आएको छैन ।
उत्तरी धादिङको रुवीभ्याली गाउँपालिका–४ हिन्दुङमा रहेको ओढारमा पहिरो खस्दा दुईजना किसान सहित २ सय ६० भन्दा बढी भेडा बेपत्ता भएका थिए । बेपत्ता हुनेहरुमा १७ वर्षीय धनबहादुर तामाङ र ४२ वर्षीय नुर्बु तामाङ रहेको प्रहरीले बताएको छ ।
सदरमुकाम धादिङवेसीबाट २ दिनको पैदल दूरीमा पर्ने रुवीभ्याली गाउँपालिकाको केन्द्र सेर्तुङबाट ६ घण्टाको पैदल यात्रामा पुग्ने ठाउँमा हिमपातबाट यस्तो घटना भएको हो ।
सोमबार सदरमुकामबाट नेपाली सेनाको हेलिकप्टरमार्फत सशस्त्र प्रहरीको टोलीले उनीहरुको खोजी गरेको थियो । टोलीले चट्टान फुटाउने उपकरण सहित विपद् व्यवस्थापन तालिम प्राप्त सशस्त्र प्रहरीहरु खोजी कार्यमा जुटेका छन् ।
उनीहरु ओढारभित्र सकुशल भेटिनसक्ने अपेक्षा खोजीमा संलग्न ३० जनाको टोलीले गरेको छ । जिल्ला प्रशासनले भने बेपत्ता भएकाको अवस्था छिटो पत्ता लगाउन पहल गरिरहेको बताएको छ ।
प्रतिक्रिया दिनुहोस !
