तनहुँ : यहाँको व्यास नगर अल्ट्रा म्याराथनका क्रममा बुधबार अनौठो घटना भयो । दोस्रो व्यास नगर अल्ट्रा म्याराथनका क्रममा एकजना सहभागी मोटरसाइकलमै चढेको भेटिएका हुन् ।
निर्धारित ४४ किलोमिटरको दूरी छिचोल्न अन्य धावकहरु दौडिरहेका बेला आयोजकले सुरुमा तेस्रो स्थान घोषित गरेका धावक रोजिन्द्र श्रेष्ठ मोटरसाइकलमा चढेको भेटिएका हुन् ।
श्रेष्ठले म्याराथनको नियम उल्लंघन गर्दै मोटरसाइकल चढेको पाइएपछि उनलाई आयोजकले निष्कासन गरेको हो । ३ घण्टा ४ मिनेटमा पुलिमराङ पुगेका भीमादका रोजिन्द्र श्रेष्ठले सबै चेक प्वाइन्ट पार नगरेको भेटिएपछि निस्कासन गरिएको नगरपालिकाका प्रवक्ता मोहनकुमार श्रेष्ठले बताए ।
प्रतियोगितामा नेपाली सेनाका खगेन्द्रबहादुर भाट विजेता बनेका छन् । तनहुँको पर्यटकीय मानुङ डाँडाबाट दमौली, चापाघाट, कलेस्ती हुँदै पुलिमराङसम्मको निर्धारित ४४ किलोमिटरको दूरी भाटले सबैभन्दा पहिले २ घण्टा ५३ मिनेटमा पुरा गरेका हुन् ।
प्रतियोगितामा साविकका विजेता नेपाली सेनामै कार्यरत डोटीका नवराज साउदले दूरी ३ घण्टा २ मिनेटमा पार गरेर दोश्रो स्थान प्राप्त गरे । उनले गत वर्ष यो दूरी ३ घण्टा १३ मिनेटमा पार गरेका थिए । व्यक्तिगत स्कोर सुधार गरे पनि उनी प्रथम हुन सकेनन् ।
प्रतिक्रिया दिनुहोस !
